Allen den, die disen brief ansehent lesent oder ho^erent lesen, kúnd ich Johans von Magelsperg¹ der alt gesessen ze || Gampun² vnd vergich des offenlich mit disem brieue fúr mich vnd fúr alle min erben, daz ich mit bedahtem || můt vnd gůter vorbetrahtung verko^vft hab vnd ze ko^vffen geben hab reht vnd redlich dem erbern vnd wol||beschaiden Hainrichen von Eppenberg³ vnd sinen erben, ob er enwa^er, den hof gelegen ze Bichwille⁴, der ainhalb sto^vsset an die kilchen vnd anderthalb an der Turbater gůt, der min lehen was von dem vorgenemten Hainrich von Eppenberg, mit aller ehafti, mit aller zů geho^erde vnd mit allen rehten vmb drissig phunt vnd vmb sechs phunt phenning gůter vnd genger Costentzer múnse, der ich gantzlich vnd gar von im gewert bin vnd enpfangen han vnd an minen gůten nutz bekert. Die selben aigenschaft des vorgeschribenen houes ze Bichwille han ich dem vorgenemten Hainrich von Eppenberg mit aller ehafti, mit aller zů geho^erde vnd mit allen rehten reht vnd redlich vf geben geuertgot vnd in sin hant brâht, als reht sitte vnd gewonlich was. Ich hab mich o^vch willeklich entzigen vnd entzieh mich mit disem brieue fúr mich vnd fúr alle min erben aller aigenschaft, alles rehten, aller vordrung vnd aller ansprâch, gaistlichs vnd weltlichs gerihtes, so ich vnd min erben, ob ich enwa^er, an dem vorgeschriben hof hattent ald hie nâch iemer gewinnen mo^ehtin. Ich han o^vch dem vorgenemten Hainrich von Eppenberg gelobt mit gůten trúwen vnd han im o^vch darzů zů mir ze merer sicherhait ze wern geben Burkarten vnd Nycolausen min elichen súne, die hant im baid mit mir gelobt mit gůten trúwen, daz wir vnd vnser erben, ob wir enwa^erint, des vorgeschribenen houes ze Bichwille vnd o^vch des vorgeschribenen ko^vffes reht wern súllent sin gen ma^enlichem an gaistlichem vnd an weltlichem geriht vnd an allen stetten, wa sin der vorgenemt Hainrich von Eppenberg oder sin erben, ob er enwa^er, bedurffent vnd nôtdurftig sint. Vnd ze ainem waren vrkúnd vnd ze ainer sta^eten sicherhait aller der vorgeschribenen dinge vnd gedinge so han ich Johans von Magelsperg da vorgenemt fúr mich vnd fúr alle min erben min insigel gehenkt an disen brief. Wir die vorgenemten Burkart vnd Nycolaus des vorgenemten Johansen von Magelsperg elichen súne veriehent ain gantz wârhait aller der dinge vnd gedinge, so von v´ns an disem brief da vorgeschriben stânt, vnd daz der vorgeschriben ko^vff mit vnserm gůtem willen gunst vnd verhengde beschehen vnd vollefu^ert ist. Vnd ze merer sicherhait der selben dinge so haben wir o^vch v´nserú insigel gehenkt an disen brief. Der geben ist in der stat ze sant Gallen an dem na^ehsten donstag nach sant Martis tag in dem jar, do man zalt von gottes gebúrt drúzehenhundert jar, fúnfzig jar vnd darnach in dem fúnften jar.

Source Fulltext: Chartularium Sangallense VII, Nr. 4424, S. 277-278.