Wir Anna von gottes gnaden eptischin des gotzhûs ze Wurmspach¹ des ordens^a) von Cytels in Costentzer bistůme vnd der convent gemeinlich des || selben gotzhûs kv´nden allen, die disen brief sehent oder ho^erent lesen, vnd veriehen offenlich fúr vns vnd fúr vnser nachkomen, das wir durch dez selben || vnsers gotzhus nutz vnd notdurft vnser hûs vnd hofstat, das Zúrich in der meren stat vnder Obernzún² gelegen ist vnd obrenthalb stôsset an Johans || Swettins hús vnd nidrenthalb stôsset an das hûs, das swester Elsbethen Manessin vnser convent swester lipding ist, das erbe ist von dem gotzhûs der kilchen ze der propstye Zúrich³ vmb zwên Zúricher pfenning, die man jerlich ze sant Reglen tag da von ze cinse geben sol, vnd das wîlent frôn Richentzen seligen Horwerin an gehorte, mit allem recht frijeheit vnd ehafti, so dar zů geho^eret, recht vnd redlich ze vnsers gotzhûs wegen ze rechtem lipding ze ko^vffenne geben haben den bescheiden frowen fron Katherinen Spetzerin burgerin Zúrich vnd Annen ir tochter vmb zwentzig pfunt vnd zwei pfunt pfenning Zúricher gewonlicher múntze, der o^vch wir nach vnser vergicht ze vnsers gotzhus wegen gar vnd gentzlich von inen gewert vnd bericht sin, vnd loben o^vch mit gůten trewen fúr vns vnd fúr vnser nachkomen ze vnsers gotzhus wegen, des selben lipdinges vf dem vorgeschriben vnserm hûse vnd hofstat mit allem rechte, so dar zů geho^eret, rechten weren ze sinne fron Katherinen Spetzerin vnd Annen ir tochter fúr ein recht erbe vmb den vorgeschriben cins in lipdinges wîse vntz ze ende ir beider wîle, beide vor geistlichen vnd vor weltlichen gerichten vnd mit namen an allen stêten, wâ oder wenne man sin notdúrftig ist, mit gůten trewen âne alle geuerde. Wêre o^vch, das dú selbe fro Katherina Spetzerin vor Annen ir tochter ab sturbe oder das ir dewedere vor der andern ab sturbe, so sol dú ander, dú dannocht lebende ist, dis vorgeschriben vnser hûs vnd hofstat mit allem recht, so dar zů geho^eret, in lipdinges wîse haben vnd niessen vntz ze ende ir wîle, vnd swenne si beide ab erstorben sint, so sol dis vorgeschriben vnser hûs vnd hofstat mit allem recht, so dar zů geho^eret, vns vnd vnserm gotzhûs gar vnd gentzlich wider von inen ledig vnd lôs sin⁴, also mit namen, das wir noch vnser nachkomen ze vnsers gotzhûs wegen mit dem lipdinge dis vorgeschriben vnsers hûs vnd hofstat gen nieman nicht fúrbas ze schaffenne haben súln, vnd súln o^vch die selben fro Kâtherina Spetzerin vnd Anna ir tochter dis vorgeschriben vnser hûs vnd hofstat in gůten êren haben mit allem dem bûwe vnd besserung, als sin das selbe vnser hûs vnd hofstat notdúrftig sin, durch das es in solichen êren blibe vnd bestande, als es ietzent stat, vnd durch das es nach ir beider tode besser vnd nicht bo^eser si noch funden werde âne alle geverde. Vnd hier v´ber ze einem waren vnd stêten vrkúnde so geben wir inen disen brief mit vnsers conventes insigel offenlich besigelt. Dis geschach vnd wart o^vch diser brief geben Zúrich, an dem nechsten cinstag vor sant Gallen tag, do von gottes geburt wâren drútzehen hundert vnd fúnftzig jar vnd dar nach in dem fúnften jare. Da ze gegen wâren her V^olrich von Glarus⁵ capplan ze Wasser kilchen⁶ ze dem obrosten altare, V^olrich Krieg, Burkardus Werkmeister burgere Zúrich vnd ander erber lúte.

Source Fulltext: Chartularium Sangallense VII, Nr. 4418, S. 271-272.