Allen den, die disen brief an sehent lesent ald ho^erent lesen, kúnd ich herr Hans von Haidelberg¹ ritter vnd vergih || offenlich an disem brief, dz ich mit wolbedahter vorbetrahtung vnd mit gůter beschaidenhait das gůt gelegen ze Zukenriet² genant || dez Schúttels gůt, dz min aigen waz, von miner not wegen mit holtz mit velde mit wasen mit zwige mit a^ekern mit wisan mit wnne || mit waide vnd mit allen rehten nútzen zinsen vnd gewonhaiten, so dar zů ho^eret, reht vnd redelich verkoffet vnd ze koffen geben han dem beschaiden man Hainrichen Singenberg von Zukenriet vnd sinen erbun vmb zwelf pfund pfenning gůter Costentzer múns, der ich alleklich vnd gar gewert bin vnd da mit ich minen grôssen schaden verkomen vnd gewendet han, vnd sol der selb Hainrich Singenberg vnd sine erben ald wem sú dz vorbenempt gůt ze koffen gent, ez sient knaben ald tohtera, vrowan oder man, daz selbe gůt genant dez Schúttels gůt von mir hern Hansen von Haidelberg vnd von minen erbun ze lehen han vnd ze lehen enphahen, wenn ez ze schulden komet, vnd so^ellint ich herr Hans von Haidelberg ritter vnd mine erben vnd nachkomen dem selben Hainrich Singenberg vnd allen sinen erbun vnd nachkomen, ez sient vrowan ald man, knaben ald tohteran, dz vorbenempt gůt ane allen erschatz vnd ane allen fúrzug lihen ze rehtem lehen, wenne sú ez an v´ns vorderunt, vnd han ich herr Hans von Haidelberg ritter dem selben Hainrich Singenberg dz vorbenempt gůt mit hus mit hofstetten vnd mit allen a^ekern vnd wisan vnd mit aller zů geho^erde, so dar zů ald dar in horet von reht ald von gewonhait vnd als ich ez vntz her inne gehebt han vnd genossen, ietzent verlihen ze rehtem lehen, vnd han och gelobt mit miner trúwe vnd bind och mine erben dar zů mit disem brief, dz wir dez vorgescriben koffes vnd gůtes fúr lehen ane fúrzug reht wern so^ellint vnd wellint sin nach dem rehten, wenn ald wa sin der vorbenempt Hainrich Singenberg ald sine erben ald nachkomen bedurfent ald notdúrftig sint vf gaistlichem ald vff weltelichem geriht. Vnd ze merer sicherhait aller vorgescribener dinge henk ich vorbenempter herr Hans von Haidelberg ritter min insigel an disen brief. Dis geschach vnd wart dirre brief geben an dem na^ehsten dunstag vor sant Gallen tag, do von gottes gebúrte warent drútzehenhundert jare, fúnfzig jare, dar nach in dem fúnften jare.

Source Fulltext: Chartularium Sangallense VII, Nr. 4419, S. 272-273.