Allen den, die disen brief ansehent lesent oder ho^erent lesen, kúnd ich Johans Rugge vogt ze Tannegge¹ vnd vergich des || offenlich an disem brief, das fúr mich kamen ze Sirnach² in dem dorf, do ich offenlich ze geriht saz, V^olrich der Múller von || Sirnach, Katherin sin êlichi wirtinne, Johans ir sun, Margareta vnd Anna ir tohteran vnd offenten da mit fúrsprechen, sú hettin || die wisen, die man nemmet die Vittelwis³, gelegen ze A^eschlikon⁴ entzwischen der herren von Vischinon⁵ vnd der von Sunnenberg⁶ wisen fúr reht aigen miner gena^edigen frowen der a^ebtischinen, dem conuent gemainlich vnd dem gotzhus ze Maggeno^vwe⁷ reht vnd redlich ze ko^vffen geben vmb vier phunt vnd vmb sechszehen schilling phenning gůter Costentzer múnse vnd hettint inen o^vch die wisen geben mit so^elicher beschaidenhait vnd gedinge, das sú vnd ir nachkomen vnd wer die wisen inne hat ja^erlich von der selben wisen ie ze sant Martis tag ainen vierdung wachses ûff den altâr ze Syrnach geben vnd richten sond, vnd gabent o^vch do die vorgenemten V^olrich der Múller, Katherina sin êlichi wirtinne, Johans ir sun, Margareta vnd Anna ir tohtran die vorgeschriben wisen mit allen rechten nútzen vnd gewonhaiten vnd mit aller zůgeho^erd ûf vnd vertgoten die miner frowen der a^ebtischinen, dem conuent gemainlich vnd dem gotzhus ze Maggeno^vwe vor geriht mit vogt vnd mit fúrsprechen, als geriht vnd vrtail gab vnd als mit gesamnoter vrtail ertailt wart vnd als recht sitte vnd gewonlich was, vnd entzigen sich o^vch da offenlich vor geriht fúr sich fúr alle ir erben vnd nachkomen aller aigenschaft, aller lêhenschaft, alles rechten gaistliches vnd weltliches gerihtes, aller vordrung vnd ansprach, so sú zů der vorgeschribenen wisen ald daran hatten oder iemer gewinnen mo^ehten von recht ald von gewonhait. Sú hant o^vch gelobt fúr sú fúr alle ir erben vnd nachkomen, der selben wisen wern ze sinne nach reht fúr reht aigen gen ma^englichem an gaistlichem vnd an weltlichem gericht, wâ des ain a^ebtischinne, der conuent vnd das gotzhus ze Maggeno^vwe bedurfent ald darumb angesprochen ald ûfgetriben wurdin, vnd ist dis alles reht vnd redlich beschehen vnd vollefu^ert mit allen den worten vnd werken, so von gewonhait vnd von reht darzů gehorten vnd no^vtdurftig warent. Vnd ze ainer warhait vnd sta^eter sicherhait aller diser vorgeschriben dinge so hab ich der vorgenemt Johans der Rugge vogt ze Tannegge min insigel gehenkt an disen brief. Wir die vorgenemten V^olrich der Múller, Katherina sin êlichi wirtinne, Johans ir sun, Margareta vnd Anna ir tohtran veriehen ain gantz warhait aller der dinge, so von v´ns an disem brief geschriben stand, vnd ze merer sicherhait der selben dinge so haben wir v´ns willeklich gebunden vnd binden v´ns vnder v´nsers vogtz Johansen Ruggen insigel da vorgenemt, won wir aigenr insigel niht haben. Dirre brief wart geben ze Syrnach in dem dorf in dem jar, do man zalt von gottes gebúrt drúzehenhundert jar, fúnfzig jar vnd darnach in dem sechsten jare, an dem na^ehsten ma^entag vor vnser frowen tag ze dem a^ernde.

Source Fulltext: Chartularium Sangallense VII, Nr. 4432, S. 281-282.