Wir der vogt vnd der rat gemeinlich der stat ze Raprehtswil¹ veriehen vnd tu^eegen kunt allen den, die disen brief lesend oder ho^er||end lesen, das an dem na^ehsten zinstag nach sant Johans tag ze súngit brůder Johans Bonwart, Berhtholt Zimer, Hans von Jesteten², Frike || vnd Heinze sin súne vnd Růdolf der Snider von Frigenbach³ fúr iúns kamend ze Raprehtswile in der stat, da wir ze rat sassend, vnd || veriahend vnd rechnetend da vor iúns, das Ba^erschi Sto^er der na^ehst vattermag wa^eri, den her Herman sa^elig von Wald⁴ iene gelan hetti, vnd do diú rechnung vnd ouch dú vergiht vor iúns beschach, do gab da vor iúns der erber herre her Heinrich von gottes ordenung abbet des gotzhus ze Rúti⁵ von^a) Premonstren ordens dem egenanten Ba^erschi Sto^ern von keins rehten wegen nun von gnaden vnd von bet wegen Johansen von Langenhart⁶ vnd ouch von bet wegen ander sinr frúnd ein pfrůnd zů dem egenanten gotzhus ze Rúti, darnach do das vor iúns beschach, do fůr der egenant Ba^erschi Sto^eri ouch da zemal vor iúns zů, vnd vmb die genade, die im der egenant abbet Heinrich getan het, als vor verschriben stat, vnd verzeh sich fúr sich vnd fúr sin erben aller der reht vnd aller der ansprach, so er oder sin erben vf den selben tag hettend oder imerme hernach gehan mo^ehtind an geislichem oder an weltlichem geriht an den abbet vnd an den conuent des egenanten gotzhus ze Rúti vnd an ir nachkumend zem ieze genanten gotzhus, vmb alles das varnd gůt, das der egenant her Herman sa^elig von Walde geben het dem abbet vnd dem conuent des egenanten gotzhus ze Rúti vmb das, das in selb dritten versorgen so^eltend vnd ouch versorgetend vnze vf sin tode an essend an trinkend an gewand vnd an aller notúrf. Vnd das dis alles war sige, darumb so geben wir die egenanten der vogt vnd der rat der stat ze Raprehtswile zeim offen vrkúnd den egenanten dem abbet vnd dem conuent des egenanten gotzhus ze Rúti vnd iren nachkumenden zem ieze genanten gotzhus disen brief besigelt mit iúnser stet insigel ze Raprehtswil, vnder dem wir die egenanten Ba^erschi^b) Sto^er, brůder Hans Bonwart, Berhtholt Zimer vnd Růdolf der Snider von Frigenbach veriehen einr warheit alles des, so von iúns geschriben stat an disem brief. So vergich ouch ich der egenant Hans von Jesteten vnder mim egen^c) insigel einr warheit alles des, so von mir geschriben stat an disem brief, vnder dem wir die egenanten Frike vnd Heinrich von Jesteten sine súne veriehen ouch einr warheit alles des, so von iúns geschriben stat an disem brief. Dis beschach vnd ward ouch dir brief geben ze Raprehtswil in der stat in dem jar, do man zalt von gottes gebúrt drúzehenhundert jar vnd fúnfzig jar, darnach in dem sechsten jar, an dem egeschriben tag.

Source Fulltext: Chartularium Sangallense VII, Nr. 4443, S. 290-291.