Allen, die disen brief ansehent lesent oder ho^erent lesen, kúnde ich Berchtolt Vngehúr burger || Zúrich vnd vergich offenlich fúr mich vnd fúr Ru^od., Elsbethen, Annen vnd Katherinen, Heinrichs || seligen dez Lidigen wilent burgers Zúrich kind, dero rechter wizzenthafter vnd erborner vogt || ich bin, vmb die hundert march silbers, so der vogt der rat vnd die burgere gemeinlich der statt ze Raprechtzwile¹ schuldig waren vnd gelten solten dem vorgenanten Heinr. seligen dem Lidigen vnd den egenanten sinen kinden, von demselben gůte die vorgenanten von Raprechtzwile alle jar geben solten ze zinse dem vorgenanten Heinr. seligen dem Lidigen, den egenanten sinen kinden vnd allen ir erben zehen march silbers, daz ich als ein vogt der vorgenanten kinden fúr si zů iren handen vnd in irem namen fúr allez das vorgeschriben houptgůt, fúr allen den cins, der vntz nu da von gevallen ist, vnd fúr allen den schaden, der an cawertzschinen oder von ko^eiffen, von botten lone oder von zerunge deheins wegen von minen vnd der vorgenanten kinde wegen daruf gegangen ist vntz vf disen hútigen tag, gewert bin emphangen vnd ingenomen han von der egenanten burger wegen von Raprechtzwile sechshundert sechtzig vnd einen guldin vollen swere vnd gůte Florencier gewicht, die mir der edel herre herr Albr. von Půchheim² lantvogt in A^ergo^ew vnd in Thurgo^ew vnd is an siner stat der von Blatzhein³ sin schriber verrichtet vnd bezalt hant gentzlich. Darvmbe sag ich in dem namen als da vor in vogtes wise fúr mich vnd dú vorgenanten kind vnd fúr alle ir erben die egenanten burger von Raprechtzwile vnd alle ir nachkomen vnd erben lidig vnd los gar vnd gentzlich allez ho^vptgůtes, aller zinsen vnd alles dez schaden gemeinlich, so si denselben kinden vntz vf disen húttigen tag deheins weges gelten vnd vsrichten solten, vnd waz ouch hantvestin oder briefen darvmbe fúrbazzer hinder mir oder den egenanten kinden funden wurden, die sullen vns hinnanthin kein nutz mere sin. Mit vrkúnde ditz briefs, besigelt mit minem ingesigel. Geben Zúrich an mendag vor sant Johans tag ze súngichten, anno domini M°.CCC°.L° sexto.

Source Fulltext: Chartularium Sangallense VII, Nr. 4442, S. 289-290.