Allen den, die disen brief ansehent lesent oder ho^erent lesen, kúnd ich Wilhelm von Brah||sperg¹ vnd vergich offenlich mit disem brieue fúr mich vnd alle min erben, daz ich den sê || in der Kagenegge², die akker hinder dem wiger an dem Wintersperg³ vnd daz hûs vnd || hofraiti gelegen in der stat ze der Núwen Rauenspurg⁴, daz man nemmet dez ammans hûs, mit allen rehten nútzzen vnd gewonhaiten vnd mit aller zů geho^erde reht vnd redlich ko^vft hân minem gna^edigen herren von gottes gnâden abt Herman⁵ sinen nâchkomen vnd dem gotzhus ze sant Gallen zů der vorgeschribenen burg ze der Núwen Rauenspurg von Johansen sa^elgen von Lên⁶ elichen wirtinnen vnd vor iren kinden⁷, vnd daz ich noch min erben zů dem noch an dem vorgeschribenen sê akkern hûs vnd hofraiti noch zů dehainem gůt, daz ich von dez vorgenemten Johansen sa^elgen von Lên elichen wirtinnen vnd von ir kinden ko^vft han, es sie benemt oder vnbenemt, enhain reht vordrung noch ansprach niemer haben noch gewinnen súllen von aigenschaft von lehenschaft von gewêr von ko^vffes wegen noch von dehainen andern sachen weder mit gaistlichem noch mit weltlichem geriht noch ân reht, won daz ich vnd min erben den vorgeschribenen sê akker hus vnd hofraiti niessen súllent mit andern gu^etern, die mir zů der vorgeschribenen burg ze der Núwen Rauenspurg versetzt sint, als die brief⁸ bewisent, die ich darumb von dem vorgenemten minem herren abt Herrn an vnd von dem cappittel dez gotzhus ze sant Gallen hân, vntz daz die selb burg lút vnd gu^eter von mir ald von minen erben erlo^est werdent. Vnd dez ze ainer wârhait so han ich Wilhelm von Brahsperg da vorgenemt fúr mich vnd alle min erben min insigel gehenkt an disen brief. Der geben ist ze sant Gallen in der stat, an der na^ehsten mitwuchen nach dem hailigen tag ze ostran in dem jâr, do man zalt von gottes gebúrt drúzehenhundert jar, fúnfzig jar vnd darnach in dem sibenden jâre.

Source Fulltext: Chartularium Sangallense VII, Nr. 4476, S. 329-330.