Allen den, die disen brief ansehent lesent oder ho^erent lesen, kúnd ich Bêrnhart der Schenk von Landegge¹ ritter vnd vergich des offenlich an || disem brief fúr mich fúr alle min erben vnd nachkomen, das der êrsam man herr Johans der Kech lúpriester ze Wil² Cůnrat den Lupfer || von Búrwald³ vnd Ma^ehthilten sin êlichen swo^ester, die von dem gotzhus ze sant Gallen min lêhen warent, mit lip mit gůt mit allen rechten || vnd mit aller zůgeho^erd von mir reht vnd redlich geko^vffet hat vnd ko^vffet mit disem brief an das vorgenemt gotzhus ze sant Gallen vmbe ahtzehen phunt phenning gůter Costentzer múns, der ich gantzlich vnd gar von im gewert bin an den stetten, da ich minen wachsenden schaden nutzlich mit verkomen han, vnd kam o^vch darumb gen sant Gallen fúr minen gena^edigen herren von gottes gnâden abt Herman des gotzhus ze sant Gallen⁴ vnd gab im da mit gůter vorbetrahtung vnd beschaidenhait den vorgenemten Cůnraten den Lúpfer vnd Ma^ehthilten sin swo^ester mit allen rechten frilich vnd letklich ûf an sin hant, vnd vertgot o^vch da die selben lút im vnd dem vorgenemten sinem gotzhus, als reht sitte vnd gewonlich was, vnd entzech mich o^vch da vnd entzieh mich mit disem brief fúr mich fúr alle min erben vnd nachkomen gen dem vorgenemten minem herren abt Herman gen allen sinen nachkomen vnd gen dem vorgenemten gotzhus ze sant Gallen an den vorgenemten lúten aller aigenschaft aller lêhenschaft aller kuntschaft aller besatzung aller zúgnust alles rechten gaistliches vnd weltliches gerichtes aller vordrung vnd ansprach, so ich daran ald darzů hatt ald iemer gewinnen mo^eht von reht oder von gewonhait ald von dehainen andren sachan, vntz an die ligenden gu^eter, die der vorgenemt Cůnrat der Lupfer von mir ze lêhen hat, vnd ist o^vch darumb sunderlich berett vnd bedingot, wâ oder wem der selb Cůnrat der Lupfer dú selben gu^eter versetzt oder ze ko^vffen git, das ich im darumb gestatten vnd fu^egen sol, wes er darumb no^vtdurftig ist, ân allen schlaht fúrzug vnd widerrêd. Ich hab o^vch gelobt mit gůten trúwen fúr mich fúr alle min erben vnd nachkomen, der vorgenemten lút vnd des vorgeschribenn ko^vffes wer ze sinne nach reht gen ma^englichem an gaistlichem vnd an weltlichem gericht, wa ald wenn sin min vorbenemter herre abt Herman sin nachkomen ald das vorgenemt gotzhus bedurfent ald no^vtdurftig sint, ân geua^erd, vnd ist dis alles reht vnd redlich beschehen vnd vollefu^ert mit allen den worten vnd werken, so von reht vnd von gewonhait darzů gehorten vnd no^vtdurftig warent vnd als reht sitte vnd gewonlich was. Vnd des ze ainem offenem waren vrchúnd vnd sta^eter sicherhait aller diser vorgeschribenn dinge vnd gedinge so hab ich der vorgenemt herr Bernhart der Schenk von Landegge ritter min insigel gehenkt an disen brief fúr mich fúr alle min erben vnd nachkomen. Der geben wart ze sant Gallen an dem na^ehsten cinstag vor sant Georien tag in dem jar, do man zalt von gottes gebúrt drúzehenhundert jar, fúnfzig jar vnd darnach in dem sibenden jare.

Source Fulltext: Chartularium Sangallense VII, Nr. 4477, S. 330-331.