Wir Herman von gottes gnaden abt des gotzhus ze sant Gallen¹ kúnden vnd veriehen offenlich an disem brief allen || den, die disen brief ansehent lesent oder ho^erent lesen, das fúr vns kament V^eli Lútolt von Langenow² || vnd Eigeldrût sin elichú wirtinne, dú selb Eigeldrût vnser vnd vnsers gotzhus reht aigen ist, vnd || gab dú selb Eigeldrut mit ir elichen mannes willen mit vogt vnd mit fúrsprechen, als reht was vnd vor vns ertailt wart, das es kraft hett, an vnser hant frilich vnd vmbetwungellich ûf zwên tail ir schůppůss ze Langenow gelegen vnd ain hofstat vnd ainen akker ze Reiden³ gelegen, das ir reht aigen was, vnd batt vns mit ernstlicher bette, daz wir die selben zwen tail der schůppůss vnd och die hofstat vnd den akker, als vorgeschriben stat, ir vnd ir erben widerlihen ze ainem rehten erblehen vnd in dem rehten, daz si vnd alle ir erben von der vorgeschriben schůppůss hofstat vnd akker aht phenning núwer Brîsger⁴ hinnenhin aller ja^erlich ze sant Gallen tag vnserm gotzhus vnd in vnsers gotzhus hof ze Ko^ellicon⁵ geben vnd weran sont. Do erhorten wir ir ernstlich bett vnd lúhen vnd lîhent mit disem brief der vorgenemten Eigeltrût vnd allen iren erben die vorgeschriben zwen tail der schůppůss vnd die hofstat vnd den akker, als vorgeschriben stat, ze ainem sta^eten vnd ewigen erblehen vnd vmb den vorgeschriben ja^erlichen zins. Vnd ist dis alles beschehen, als es kraft hatt vnd haben sol nu vnd o^vch hienach vnd als ertailt wart von reht vnd von gewonhait. Vnd des ze ainer sta^eten sicherhait aller der vorgeschriben ding vnd geding so haben wir abt Herman da vorgenemt vnser insigel gehenkt an disen brief. Der geben wart ze sant Gallen an der na^ehsten mitwuchen vor sant Georien tag in dem jar, do man zalt von gottes geburt drúzehen hundert jar, fúnfzig jar vnd darnach in dem sibenden jar.

Source Fulltext: Chartularium Sangallense VII, Nr. 4479, S. 333.