Ich Hainr. Marquart von La^elwang¹ ain vrige lantrichter ze Schatbůch² in der grafschaft || zem Hailgenberg³ tůn kunt, daz fu^er mich kom an den lantag ze Bitzenhouen⁴ des nachosten || zinstagz vor sant Vrbans tag dis erbern lu^et Hans der Sporer vnd V^olr. Lener burger ze || sant Gallen vnd battent mich, das ich sa^ech vnd hiez lesen die brief vnd hantfestina, die du^e stat vnd die burger von sant Gallen hant von ku^engen vnd von kaisern vnd sunderbar von ku^eng Karlen von Rom⁵, da ir frihait vnd iru^e reht an stant, die brief mit vrtail gelesen wurdent vnd sunderbar ain brief, den si hant von mim vorvarn, der^a) frigen von Bu^erron⁶ lantrichter vor malz waz ze Schatbůch, v^eber die vorgenanten brief vnd hantfestinan, die brief also stůndend, das die vorgeschriben burger vnd du^e stat ze sant Gallen die frihait vnd du^e reht hant von ku^engen vnd von kaiserz^b) vnd sunderbar von ku^eng Karllen von Rom, das er in du^e reht vnd frihait geben hat vnd besta^ettet, alz ins sin vorvarn och geben hant, das kain weltlicher richter herzog noch graf noch kain ander richter^c) su^e fu^er sich triben noch laden sol, vnd das si nieman vf kain langeriht triben noch laden sol, wan das ma^englich das reht von den obgeschriben burgern vordern vnd nemen sol ze sant Gallen in der stat vor dem amman, ez wa^er danne, das aim kleger da reht verzigen wurd. Do nu dis allez beschach vnd die brief gelesen wurdent, do battent die obgenanten Hans der Sporer vnd V^olr. Lener von sant Gallen zer varend mit vrtail, ob ich itt wol durh reht den egenanten burgern allen gemainlich der stat ze sant Gallen dar v^eber min vnd des langerihtz ynsigel ze Schatbůch geben solt, den si fůrtint, wa si sin bedurfent, wan si ir ku^englich vnd kaiserlich brief vnd hantfesti nit gewa^erlich turrent vs gesenden vf allu^e geriht durh jegelichen iro burger, da si sin notturftig sint, das ward in ertailt vnzerworfenlich, das ich in disen brief wol durh reht geben so^elt. Ez ward och mer ertailt, wa die burger von sant Gallen disen brief vs sendent, vf welaz geriht das ist vnd durh weler iro burger, das der alz gůt kraft hat vnd haben sol, alz ob si ir ku^englich vnd kaiserlich brief vnd hantfestina vs santint. Vnd dez ze vrku^end der warhait darvm so henk ich vorgenanter lantrichter min vnd dez langerichtz insigel ze Schatbůch an disen brief. Der geben ist nach rehter vrtail ze Bitzenhouen dez jarz, do man zalt von gottes geburt dru^ezechen hundert jar, dar nach in dem su^ebenden vnd fu^enfzigistem jar, dez obgeschriben zinstagz.

Source Fulltext: Chartularium Sangallense VII, Nr. 4480, S. 333-334.