Dem edeln frijen herren hern V^olrich von Clingen lantrichter in Turgo^vwe emb(iet) ich Cůnr. von Wartenberg¹ ain frije hofrichter von mins herren des Ro^emschen kayser Karlen gewalt an siner statt vff sinem hof ze Rotwil minen willigen dienst mit trúwen vnd tůn v´ch kunt, daz des edeln herren graf Cůnr. von Fúrstenberg erber botschaft mit vollem gewalte vnd mit briefen vnder sinem insigel vor mir vff dem hof ze Rotwil gestanden ist vff disen tag, als dirre brief geben ist, vnd hant gesait, daz ir minen herren graf Cůnr. von Fúrstenberg fúr vch geladt habent von clag wegen des edeln herren graf Fridrichs von Toggenburg. Dar vmb baten inen die selben mins herren graf Cůnr. bottschaft ze erfarnde an ainer vrtail vnd sprachen also, min herre graf Fridrich von Toggenburg der were ain offenner vnd verschribener abere^achter von des hofgerichts wegen ze Rotwil, vnd won der selb abere^achter minen herren graf Cůnr. fúr v´ch geladt hetti, so getrúweti min herre graf Cůnr. nicht, daz er kainem abere^achter vor v´ch antwurten so^elte, vnd o^vch, daz kain e^achter noch abere^achter kain recht haben so^elte v´ber daz alles, so weri daz hofgerichte ze Rotwil ob allen hofgerichten daz obroste vnz an daz hofgerichte, da ain kayser selber were, vff dem selben hofgerichte ze Rotwil so wo^elte er im rechtes gern gehorsam sin, vnd darzů me, weri ioch, daz der von Toggenburg nit ain e^achter noch ain abere^achter were, wer denne dem andern rechtes gehorsam sin wo^elte vff dem hof ze Rotwil, den so^elte man anderswar niendert triben noch laden denne fúr daz selb gerichte, won es daz obreste ist. Vnd dar vmb wart geuorschet, was recht were, vnd wart ertaillet mit rechter vnd gesamnoter vrtail, als vff dem hof ze Rotwil recht was, daz der . . schriber saiti vff sin ait, ob min herre von Toggenburg in der aberachte weri oder nit, der sait vff sin ait, daz er ain offenner verschribener abere^achter were, vnd do er daz gesaite, als recht was, do wart ertaillet mit gesamnoter vrtail, daz ir dem obgenanten graf Fridr. von Toggenburg, der ain offenner verschribener abere^achter ist, nútzit richten so^eltent von minem herren graf Cůnr. von Fúrstenberg, won kain e^achter kain recht haben sol noch enmag, weri aber, daz ir es dar v´ber te^atint, daz denne daz selb v´wer gerichte in der selben sach enhain kraft noch macht nicht haben so^elte noch enmo^echte susse noch so luterlich vnd ainvalteklich vnd ane aller schlacht geuerde, vnd won dis vor mir beschehen ist mit vrtail, als recht was, so han ich des hofgerichts ze Rotwil insigel mit vrtail offenlich gehenkt an disen brief. Der ze Rotwil geben ist an dem nehsten donrstag nah sant Valentines tag, nach Kristus geburt drúzehenhundert iar, darnach in dem achteden vnd fúnfzigesten iare.

Source Fulltext: Chartularium Sangallense VII, Nr. 4526, S. 371.