Wir Herman von gottes genaden abt ze sant Gallen¹ kúnden vnd veriehen offenlich an disem brief allen, die in sehent || oder ho^erent lesen, das fúr v´ns kam, do wir offenlich ze geriht sassen, dú erber vnd wolbeschaiden Anna wilunt Gerwig des || Paiiers sa^elgen elichi wirtinn vnd nam Walthern den Blarrer vnsern statamman ze sant Gallen² ze fúrsprechen, der offnot || von ir wegen vnd an ir stat, das dú selb Anna etwas vor v´ns schaffen wo^elt gen maister Johansen von Gaiienhouen³ der schůler schůlmaister ze sant Gallen, vnd bat v´ns der selb Walther, das wir erfu^eren an gemainer vrtail, wie si sich stellen so^elt, als reht wa^er vnd kraft hetti, das tâten wir, vnd wart ertailt an gemainer vrtail, das si ainen vogt nemen so^elt, wen si wo^elt. Do nam si Hainrich den Paiier burger ze sant Gallen ze ainem vogt, darnach nam si aber mit des selben ir vogtes willen den êgenemten Walther den Blarrer ze fúrsprechen, der offnot von ir wegen vnd an ir stat offenlich vor v´ns vnd dem geriht, das sich gefu^eget hett, das Gerwig der Paiier ir elicher wirt, die wil er lebt, zů ir handen vnd an ir stat braht hett Bilgrin dem Spiser vnd Cu^enin Vo^elin burger ze sant Gallen sin hûs gelegen ze sant Gallen an Spîser tor⁴, das er ko^vft vmb Růdolf den Spiser, mit hofstat vnd mit allen rehten, so darzů geho^erent, versetzt hett reht vnd redlich nach der stat ze sant Gallen reht vnd gewonhait vmb sehzig phunt gůter vnd ga^eber Costentzer múns, vnd das si das selb hûs mit hofstat vnd mit allen zůgeho^erden ze ko^vffen geben hett redlich vnd reht dem obgenemten maister Johansen vmb vierzig phunt vnd sehs phunt phenning gůter vnd gena^emer Costentzer múns, won ir nieman me darumbe geben wolt, der selben phenning si o^vch von dem vorgenemten maister Johansen gantzlich vnd gar geriht vnd gewert wa^er, in ir vnd ir kinden gůten nutz bekert hett vnd das si dauon dem selben maister Johansen das selb hus vertgon wo^elt, als er sin notdurftig wa^er, vnd do ze mâl veriahen die obgenemten Bilgri^a) Spiser vnd Cu^eni Vo^eli offenlich vor v´ns vnd dem geriht, das alles das war wa^er, so die egenemt Anna von ir vnd inan mit ir fúrsprechen vor v´ns geoffnot hett, als vorgeschriben stat an disem brief, vnd das sú o^vch von ir bett wegen das vorgeschriben hûs mit hofstat, mit allen rehten, so darzů geho^erent, gantzlich ledig wo^eltin lassen, als es kraft hett vnd vor vns ertailt wart. Nach dem allem, do bat vns der vorgenemt Walther der Blarrer, das wir erfu^eren an offner vrtail, wie die obgenemt Anna vnd o^vch die vorgenemten Bilgri vnd Cu^eni von dem vorgedahten hûs vnd phant gan so^eltin, das es kraft hetti vnd dem vorgenemten maister Johansen notdurftig wa^er, das taten wir, vnd wart ertailt mit gemainer vrtail, das die obgenemt Anna mit ir vorgenemten vogtes hant vnd och die egenemten Bilgri Spiser vnd Cu^eni Vo^eli mit ir handen das vorgenemt hûs mit allen rehten vnd zů geho^erden vnd als es in versetzt wart, an vnser hant gantzlich ledig so^eltin lassen vnd das dis kraft hett vnd reht wa^er. Do fůr zů die vorgenemt Anna mit ir vogtes Hainrichs Paiiers hand vnd o^vch die vorgenemten Bilgri vnd Cu^eni mit ir handen vnd liessen das vorgeschriben hûs mit hofstat vnd mit allen rehten, als es inan versetzt was, als vorgeschriben stat, luterlich an vnser hand ledig vnd lôs. Vnd do dis beschah, do stůnt der vorgenant Hainrich Paiier vor v´ns vnd nam aber ze fúrsprechen Walthern den Blarrer vorgenemten im vnd Johansen vnd Leonharten sines brůder sa^elgen Gerwigs Paiiers elichen súnen, der rehter vogt er was, der offnot von des selben Hainrichs vnd der kind wegen, das den selben Hainrich dunkti vnd o^vch wol erkandi, das der obgenemt maister Johans das vorgenemt hûs als wol vergulten hett vnd das den vorgedahten kinden mit dem selben ko^vff als wol beschehen wa^er, das er vnd die vorgenemten kind die aigenschaft des selben hûses dem êgenemten maister Johansen vnd siner êlichen wirtinnen Annun der Ke^achinun billichun vf geben vnd vertgon wo^eltin, als es kraft hett vnd reht wa^er vnd vor v´ns ertailt wurt. Do batt v´ns der dikk genemt Walther Blarrer von iren wegen, das wir erfu^erent an gemainer vrtail, wie si das tůn so^elti, das es kraft hetti, das taten wir, vnd wart ertailt mit gemainer vrtail, das die vorgenemten knaben mit ir vorgenemten vogtes vnd och mit vnser hant das tůn so^eltint. Do giengent die vorgenemten kind vnd der obgenemt Hainrich ir rehte vogt, als och ertailt was, vnd gabent vf das vorgeschriben hûs mit hofstat, mit allen rehten, so darzů gehorten, an vnser hant, vnd batt v´ns der selb Hainrich von sin selbers vnd der kind wegen, das wir das selb hûs mit allen rehten vnd zůgeho^erden, als vorbeschaiden ist, lúhen dem êgenemten maister Johansen vnd Annun siner elichen wirtinnen. Darnach do batt vns der obgenemt maister Johans, das wir im vnd Annun siner elichen wirtinnen das selb vorgenemt hus mit hofstat vnd mit allen rehten, so darzů hortan, lúhent ze ainer rehten gemaind. Do erhorten wir des vorgenemten Hainrichs vnd des êgenemten maister Johansen bett vnd lúhen vnd lihent mit disem brief dem selben maister Johansen vnd Annun siner êlichen wirtinnen das obgeschriben hûs mit hofstat vnd mit allen rehten, so darzů geho^erent, ze ainer rehter gemaind, also vnd och in den rehten, weders vnder in von todes wegen ab gat, das denn das ander, das dennoht vnder in lebot, das selb vorgeschriben hûs mit allen rehten vnd zůgeho^erden vor allen erben haben vnd erben sol. Vnd dis ist alles beschehen vnd vollefu^ert mit allen den worten vnd werken, so darzů gehorten vnd notdúrftig warent von reht vnd von gewonhait. Vnd des ze merer sicherhait aller der vorgeschribenen ding so haben wir abt Herman da vorgenemt v´nser insigel gehenkt an disen brief, won es o^vch ertailt wart, das wir es tůn so^eltint. Wir die vorgenemten Anna Gerwigs Paiiers sa^elgen wilunt êlichi wirtinn, Hainrich der Paiier der vorgenemten Annun vnd iro kinden vogt vnd Walther der Blarrer fúrsprech ir allen, als vorgeschriben stat, Bilgri der Spiser vnd Cu^eni Vo^eli veriehent offenlich an disem brief, das alles das war ist vnd o^vch vollefu^ert vnd beschehen ist, als von v´ns da vorgeschriben stat. Vnd ze merer sicherhait der warhait so haben wir o^vch vnsrú aigen insigel gehenkt an disen brief. Aber ich Hainrich der Paiier han min aigen insigel fúr mich vnd fúr die vorgenemten kind Johansen vnd Leonharten von mins vogt rehtz wegen gehenkt an disen brief. Der geben wart in der stat ze sant Gallen, do man zalt von gottes gebúrt tusent jar, drúhundert jar vnd darnach fúnfzig jar vnd aht jar, an der hailgon martrer tag Cosme vnd Damiani.

Source Fulltext: Chartularium Sangallense VII, Nr. 4561, S. 409-411.