Wir . . der burgermeister . . der rat vnd . . die burgere gemeinlich der stat Zúrich veriehen vnd tůn kunt offenlich mit disem || briefe vmb alle die giselmal vnd die schaden, die wir alleklich oder bi teilen wir alle gemeinlich oder v´nser deheiner || sunderlich mit giselscheften, mit ko^eiffen, mit cinsen vnd mit gesůche oder in ander wege an christanen, an kawertzschinn || oder an juden vfgetriben vnd getan, geiaget oder gemachet haben vf die erbern lúte die . . purgere gemeinlich der statt ze Ratprechtzwile¹ von solicher geltschulde, gu^eter vnd bereitschaft wegen, die si gemeinlich vsgewunnen hatten den grafen von Habspurg² zů den ziten iren herren oder inen selber, da hinder sich dú selbe stat Ratprechtzwile vnd die purger gemeinlich verbunden hatten vnd gisel oder búrgen darumb v´ber sich selber gen v´ns allen gemeinlich oder gen v´nser deheinem sunderlich oder gen iemann anders gesetzet vnd geben hatten deheins weges vntz vf disen húttigen tag, daz wir darumb mit denselben burgern gemeinlich von Ratprechtzwile v´ber ein komen vnd berichtet sin lieplich vnd gu^etlich, vnd daz ouch wir von iren wegen alles houptgůtes, cinses vnd schadens in dem namen als da vor gar vnd gentzlich bericht vnd bezalt sin, vnd sagen ouch darumb fúr v´ns vnd v´nser nachkomen die vorgenanten burgere von Ratprechtzwile vnd alle ir nachkomen ledig vnd los aller der ansprache, so wir alle gemeinlich oder v´nser deheiner sunderlich vmb die vorgenanten houptgůt, zinse vnd schaden zů inen iemer gehaben mo^echten deheines weges, ane alle geuerde. Ouch habent vnser purger, die dise sachen angiengen, widergegeben den obgenanten von Ratprechtzwile alle die schuldebriefe, die dieselben vnser purger gemeinlich oder sunderlich mit der obgenanten grafen von Habspurch oder mit der stat ze Ratprechtzwile ingesigeln versigelt hatten v´ber soliche houptgůt, cinse oder schaden, als vor bescheiden ist. Were aber, das solicher briefen deheine mere hienach funden wurden hinder v´ns allen gemeinlich oder hinder vnser deheinem sunderlich oder wie es sich denne fůgte, das ieman derselben briefen icht mere her fúr ziehende wurde, das sol den obgenanten von Raprechtzwile vnd allen iren nachkomen vnschedlich sin, wan dieselben briefe hinnenthin tot sin vnd enhein kraft mere haben noch gewinnen súllen in keinen wege ane alle geuerde. Was ouch wir gemeinlich keinerley andrer buntnúzze oder gelúbde haben zů den egenanten von Ratprechtzwile gemeinlich oder si zů v´ns, der sagen wir si lidig vnd los gentzlich, wan ouch si v´ns aller buntnúzze lidig gelazzen habent. Vnd darúber zů einem waren vesten vnd offennem vrkúnd haben wir die obgenanten von Zúrich v´nsrer statt ingesigel fúr v´ns vnd v´nser nachkomen gehenket an disen brief. Der geben ist Zúrich an dem sibentzehenden tag des manodes meyen nach Christes gebúrt drúzehenhundert vnd fúnfzig jaren vnd darnach in dem achtoden jare.

Source Fulltext: Chartularium Sangallense VII, Nr. 4542, S. 384.