Wir . . der vogt . . der rat . . vnd die burger gemeinlich der statt ze Rapreswile¹ veriechen vnd tůn kunt offenlich mit disem brief vmb die ta^egding, die der hochgeborn fúrst vnser gena^ediger herr hertzog Ru^od. || von O^esterrich² fúr v´ns vnd von v´nsern wegen getan vnd gehept hat mit den burgern gemeinlich von Zúrich vmb alle die gyselmal vnd die schaden, so die selben von Zúrich alleklich oder by teilen si alle gemeinlich || oder ir deheiner sunderlich mit cinsen gyselscheften ko^effen oder mit gesůch an krystan an qa^vwertschin oder an juden vf v´ns gemeinlich getriben habent³ deheines weges, von wem oder wie sich dz gefu^egt hat vntz vf disen || hútigen tag, des selben schadens vnd o^vch des ho^vptgůtes vnd der cinse, daruf der schad aller gewachsen vnd getriben ist, wir vnd alle v´nser nachkomen ledig vnd los sin súllen von allen Zúrichern gemeinlich vnd von ir ieclichem sunderlich vnd o^vch von allen den, die zů inen geho^erent, an alle geuerd. Das in die selben ta^egding nicht begriffen sint die geltschulden vnd dú stuk, dú hienach geschriben stand, des ersten die hundert dry vnd drissig mark silbers, die wir gelten súlent dem Malterer von Friburg⁴, darnach die sechshundert guldin, die wir gelten súln dem Seuogel ze Basel⁵, item die drúhundert guldin, die wir gelten súln Berchtolt Kal v´nserm burger, item die hundert sechzig vnd zwen guldin, die wir gelten súlent dem Russinger⁶ o^vch v´nserm burger, noch die zweintzig mark silbers, die wir gelten súln dem von Herteinstein⁷, vnd wz der búrgen von Zúrich ist, die wir vmb die obgenanten stuk ze búrgen versetzet haben, die sv´lent wir ledigen vnd lo^esen von allem dem schaden, in den si hinnanhin von der selben burgschaft wegen iemer koment, nach wisung der briefen, die wir v´ber die vorgeschriben geltschulde vormals geben haben, won die selben brief vmb all die egenanten stuk in aller ir kraft vnd macht beliben súllent, vntz das wir si vmb dz ho^vpgůt vnd vmb alle die zinse vnd schaden, so hinnanhin daruf lo^vffent, erledigen vnd erlosen, a^vn alle geuerd. Ist o^vch, das wir an dien vorgenanten erbern lúten, dien wir dú vorgeschriben stuk gelten súln, erwerben mugen, das si ander búrgen na^emen an der statt, die Zúrich burger sint, des súlent v´ns die selben von Zúrich gunnen vnd darzů fúrderren a^vn alle geuerd. O^vch sol man wizzen, dz in disen vorgeschriben tagdingen nv´t begriffen sint zwei hundert pfunt pfenning, die man nemt stebler⁸, die wir dem fromen knecht Za^ewúsch von Meylan⁹, den man nemt Ma^etmestetten, gelten sv´llen von des wines wegen, so wir von im ko^vfft hatten, darumb er vormals v´nsern brief hat, vnd sv´lent im oder sinen erben die selben zwei hundert pfunt richten vnd geben vf den na^echsten sant Martis tag, oder wir súllen inen aber zweintzig pfunt pfeinning der egenanten múntz douon nv vf den na^echsten sant Martis tag vnd dannanhin alle jar vf daz selb zil ze cinse geben vnd súlent inen o^vch das ho^vpgůt vnd den cins versichern vnd gewiz machen mit burgschaft vnd mit briefen, als gewonlich vnd bescheidenlich ist, a^vn alle geuerd. O^vch sint in disen vorben(empten) ta^egdingen nút begriffen die gyselmal noch die schaden, die Heinrich ab dem Wasen¹⁰ vnd Wilnheln Marty mit gyselschaft, mit gesůch, mit ko^effen oder mit dekeinen andern dingen vf v´ns in dem namen als douor getriben, verleistet vnd gehept hant dekeines weges vntz vf disen hútigen tag, an all geuerd, vnd als die selben zwen Heinr. ab dem Wasen vnd Wilnheln Marty fúr alle die selben schaden von v´ns benamzet hant vier hundert guldin Florentzer gewicht, do haben wir die selben vier hundert guldin ze iiren handen vnd von ir heizzens wegen gelopt vnd loben mit disem brief ze geben vnd ze richten gar vnd gentzlich dem bescheiden manne Heinr. von Hasel burger Zúrich oder sinen erben o^vch vf den nechsten sant Martis tag, der nv schierost kumt, oder wir sv´lent inen aber douon geben nv vf den selben sant Martis tag vnd dannanhin alle jar vf das selb zil ze cinse vierzig guldin der vorgenanten gewicht vnd sv´len inen o^vch dz ho^vpgůt vnd den cins versichern vnd gewiz machen mit burgschaft vnd mit briefen, als gewonlich vnd bescheidenlich ist, an all geuerd. Wir súlent o^vch vmb dú vorgenanten beidú stuk, ob es ze schulden kumt, solich búrgen setzen, die vngeuarlich ze geben vnd ze na^emen sint vnd die doch nv´t burger Zúrich sin. Was wir o^vch gemeinlich von v´nser statt keyner leye ander búntnv´zze oder gelúbde haben mit den egenanten von Zúrich gemeinlich oder si zů v´ns, der sagen wir si ledig vnd los gentzlich, won o^vch si v´ns aller buntnúzz ledig gelassen habent. Hieby warent, die diser dingen sint gezúge, die edeln vnd erber herren her Ott von Misso^vw¹¹, her Fridrich von Wallze^a)12, her Heinr. der Raspe v´nsers gnedigen herren herzog Ru^od. von O^esterrich hofmeister, Heinr. der Brunner sin kamermeister, her Wolfgang von Winden¹³ v´nser gna^edigen fro^vwen der herzogin hofmeister, herr Johanse von Platzhein¹⁴ des egenanten v´nsers herren des hertzogen kantzeler, Johs. von Langennhart vogt ze Rapreswile¹⁵ vnd ander erber lúten vil. Vnd dz dis vorgeschriben alles war vnd sta^et sij, so haben wir der vorben(empten) v´nser statt ze Rapreswile gemein insigel offenlich geheinket an disen brief. Der geben ist ze Rapreswilee^b) an dem zweintzigosten tag des manodes meyien nach Crystes gebúrt tusent drúhundert vnd fúnfzig jaren vnd darnach in dem achtenden jare.

Source Fulltext: Chartularium Sangallense VII, Nr. 4544, S. 386-388.