Ich Johans von Scho^ennenberg vnd fro Vrsell sin elichú husfrow enbieten den erbern || bescheidenn v´nsern lúten allen, die wir ze lehen bis har von v´nserm gna^edigen herren || dem bischof ze Costentz vnd von sinem gotzhus gehebt hant, v´nsern grůs vnd || was wir gůtes vermugen. Wir tůn v´ch ze wissen, daz wir Scho^ennenberg dú vesti mit lút vnd mit gůt vnd mit allen zů geho^erden frilich vnd vngetwungenlich ledklich vf geben hand v´nserm gna^edigen herren byschof Heinrich von Costentz vnd sinem gotzhus ze Costentz. Dar vmb so lassen wir v´ch ledig vnd los aller der gelúpte diensten vnd rechtes, so wir beidú bis har vntz an disen húttigen tag, als dirr brief geben ist, zů v´ch gehebt haben, vnd bitten heissen vnd manen v´ch des selben eides, so ir v´ns for mals getan hant, das ir dem vorgenanten v´nserm herren dem bischof sim gotzhus swerent gehorsam ze sin vnd ze dienen, als ir vormals v´ns getan hant, der o^vch den erwirdigen vesten herren graf Hartman von Wartstein sinen diener zů v´ch gesendet hat, dem ir die gelúpt vnd eide zů des egenanden v´nsers herren des bischofs handen tůn súllent in aller der wise, als ob er selber da wa^er. Das gebieten vnd heissen wir v´ch bi den eiden, so ir v´ns vormals gesworn hant. Vnd des ze vrkúnd so han ich der vorgenant Johans von Scho^ennenberg min insigel ze rugg geleit an disen brief. Der geben ist ze Costentz an dem zinstag vor sant Gallen tag, anno domini millesimo CCC^oLX^mo, indictione tertiadecima.

Source Fulltext: Chartularium Sangallense VII, Nr. 4705, S. 519.