Ich Růdolf von Roggwille Stattamman ze Costentz¹ tůn kvnt allen, die disen brief ansehent oder ho^erent lesen, || das fro Vrsvll Johansen von Scho^enenberg elichv´ wirtin fúr mich kam fúr geriht mit dem selben ir elichen || wirt, vnd offnet da mit fúrsprechen, si het etlichv´ reht ze der burg Scho^enenberg vnd lút vnd gůt, die || dar zv^o hortint vnd lehen wa^erint von dem gotzhus ze Costentz, es wa^er von hainstúr von widerlegung von gemainde von pfantschatz ald was rehtes si dar zv^o het ald ieman andre von ir wegen gehaben mo^eht, der selben rehte wo^elt si sich entzihen an mins herren hant bischof Hainrichs vnd an sin gotzhus ze Costentz. Vnd bat ir ervaren an ainer vrtail, wie si das tůn so^elt, als reht wa^er vnd das es kraft het. Do ward ertailt mit gesamnoter vrtail, das die selb fro Vrsvll vmb die sach ainen andern vogt na^em vor geriht mit ir elichen wirtes willen, vnd das si der danne ze drin malen vss dem ring fůrti vnd si ze ieglichem mal frageti, ob si das entzihen gern willeklich vnd vnbetwungenlichen ta^et. Do můtat die selb fro Vrsvll von Scho^enenberg des edlen herren grafen Hartmans von Wartstain² ze vogt, der ward ir och mit vrtail vmb die sach ze vogt geben vor geriht. Der selb vogt fůrt si och nach vrtail ze drin malen vss dem ring vnd fraget si ze ieglichem mal besvnder, ob si das entzihen gern willeklich vnd vnbetwngenlichen ta^et, vnd gieng och ze ieglichem mal wider in mit ir vnd sait vff sinen aide, das si im gesait het, das sis willeklich gern vnd vnbetwungenlichen ta^et. Do ward ertailt mit reht gesamnoter vrtail, das die vorgenant fro Vrsvll dar gienge vnd sich da offenlichen vor geriht mit des obgenanten ir vogtes hant vnd mit ir elichen wirtes willen entzige der vorgenanten burg Scho^enenberg lút vnd gůt mit aller zv^o geho^erde, die lehen wa^erint von minem herren dem bischof vnd von dem gotzhus ze Costentz vnd als vorgeschriben stat, an des vorgenanten mines herren hant bischof Hainrichs hant von Costentz vnd an sines gotzhuses stat, vnd das es danne wol durch reht kraft vnd maht het. Das entzihen vollefůrte och da die obgenant fro Vrsull offenlichen vor geriht mit ir vogtes hant vnd mit ir elichen wirtes willen, als ir mit frag vnd mit vrtail ertailt ward. Vnd des ze vrkv´nd gib ich der vorgenant amman min insigel an disen brief. Darnach vergehin wir die vorgenanten grafe Harman von Wartstain vogt in dirre sach vnd Johans von Scho^enenberg ainer ganzer warhait aller diser vorgeschribner dinge. Vnd des ze vrkv´nd habint wir och baid v´nsrv´ insigel gehenkt an disen brief. Der ist ze Costentz geben, do man von Cristes gebúrt zalt drúzehen hundert jar, dar nach in dem sehzigosten jar, an dem na^ehsten zinstag vor sant Gallen tag.

Source Fulltext: Chartularium Sangallense VII, Nr. 4704, S. 518.