Allen den, die disen brief ansehent lesent oder ho^erent lesen, tůn ich Hainrich der Wlweber burger ze Wil¹ kunt vnd vergich offenlich mit || disem brief fúr mich vnd fúr alle min erben, das ich von miner redlichen not wegen reht vnd redlich verkoft hân die wisen || gelegen ze Wil entzwischent dem wůr vnd dem Rietbach², die min aigen was, vnd hân ze koffenn geben dem erwirdigen in gotte || abt Hainrichen vnd dem gotzhus ze Rúti³ Premonstrier ordens in Costenzer bistôm vmb drú pfunt pfenning gůter Costenzer múns, der selben pfenning ich och gantzlich von im gewert bin, die selben wisen hân ich och mit allen rehten dem vorgenemten abt Hainrichen vnd dem gotzhus vfgeben vnd geuergot, als reht sitte vnd gewonlich was, vnd hân mich och darúber enzigen vnd enzih mich mit disem brief fúr mich vnd fúr alle min erben gen dem vorgenemten abt Hainrichen vnd dem gotzhus aller aigenschaft aller lehenschaft^a) aller manschaft aller kuntschaft aller zúgnúst lút vnd brief aller vordrung vnd ansprach, so ich von reht oder von gewonhait zů der vorgeschriben wisen ald daran hatte oder von kainer lay sach wegen iemer gewinnen mo^echt. Ich hân och gelobt fúr mich vnd fúr alle min erben, der vorgeschriben wisen vnd des kofs wer ze sinn fúr aigen nâch reht gen ma^englichem vf gaistlichem oder vf weltlichem geriht, wa vnd wenn ald wie dik sin min vorgenemter herre abt Hainrich vnd das vorgeschriben gotzhus bedurfent vnd notdurftig sint ald darumb vfgetriben vnd angesprochen werdent, daz ich sú darumb verstan vnd versprechen sol vnd von der ansprach entrihen vnd ledig machen ân geua^erd. Vnd des ze ainer warhait so hân ich gebetten den beschaidenn manne Albrehten von Lindenberg⁴ schulthaissen ze Wil, daz der sin insigel fúr mich gehenket hat an disen brief, won ich aigenes insigels nút enhân. Ich Albreht von Lindenberg schulthais da vorgenemt vergich, daz ich durch ba^et des vorgenemten Hainrich Wlwebers min insigel fúr in gehenket han an disen brief, won er aigenes insigels nút enhat. Der geben ist ze Wil in dem jar, do man zalt von gottes gebúrt drúzehenhundert jar, sechzig iar vnd darnach in dem ersten jar, an dem na^ehsten zinstag ze vsga^enter osterwochen.

Source Fulltext: Chartularium Sangallense VII, Nr. 4730, S. 538-539.