Karolus quartus divina favente clemencia Romanorum imperator semper augustus et Boem(ie) rex tenore presencium || notum esse volumus universis, quod in presencia nostre imperialis celsitudinis constitutus venerabilis Georius abbas monasterii sancti || Galli³ ordinis sancti Benedicti Constanciensis dyocesis princeps noster dilectus et devotus a nobis humiliter supplicavit ea qua || decuit reverencia et honore, quatenus eundem de feudis terris et universaliter bonis temporalibus omnibus et singulis dictorum monasterii et abbacie, que a nobis et sacro Romano tenet imperio, infeudare et investire solita Cesaree maiestatis benignitate dignaremur. Nos igitur deum pre oculis habentes et venerantes iusticiam, que unicuique dare imperat, quod suum est, recepto a predicto Georio fidelitatis et homagii solito iuramento, quibus nobis et sacro obligatur imperio, eundem Georium de omnibus et singulis feudis terris et bonis temporalibus, que a nobis et dicto Romano de iure tenet imperio, infeudavimus et investivimus per sceptrum imperialis, ut moris est, eminencie osculo comittante et ipsum pariter infeudamus et investimus presentibus de eisdem, mandantes et firmiter precipientes^a) vasallis ministerialibus officiatis et aliis hominibus quibuscumque monasterii sancti Galli prefati, ut abbati predicto sicut domino suo in omnibus, quibus debent, obediant humiliter et obnixe^a), presencium sub imperialis nostre maiestatis sigillo testimonio litterarum. Datum Nuremberg, anno domini millesimo trecentesimo sexagesimo primo, indict. quarta decima, VIII. idus februar., regnorum nostrorum anno quintodecimo, imperii vero sexto.

Source Fulltext: Chartularium Sangallense VII, Nr. 4722, S. 529.