Allen den, die disen brief ansehent lesent oder ho^erent lesen, tůn ich Hainrich der Hartzer V^olrichs des Hartzers || sa^eligen sun burger ze Costentz kunt vnd vergich des offenlich an disem brief fúr mich vnd fúr Růdolfen vnd || V^olrichen min brůder, das der hof ze Kesswille¹, der des gotzhus ze sant Gallen reht aigen ist, mir vnd den || selben minen brůdern mit allen rehten, so darzů geho^erent, von dem erwirdigen herren abt Georien von gottes genâden abt² vnd dem conuent des gotzhus ze sant Gallen vmb fúnf vnd vierzig mark silbers Costentzer gewa^eges ze ainem gewerten pfant versetzt ist, als der brief³ bewiset, den ich vnd die egenemten min brůder darumb von in habent. Vnd des ze ainem wâren vrkúnd vnd sta^eter sicherhait henk ich min insigel an disen brief fúr mich vnd die egenemten min brůder, won sú aigener insigel nit enhatton. Der geben ist ze sant Gallen an dem na^ehsten donstag nach v´nser fro^vwen tag ze dem ernd in dem jâr, do man zalt von gottes gebúrt drúzehenhundert jâr vnd darnach in dem ain vnd sehtzigosten jâr.

Source Fulltext: Chartularium Sangallense VII, Nr. 4732, S. 540.