Allen den, die disen brief ansehent lesent oder ho^erent lesen, tůn ich Walther von Bichelse¹ kunt vnd vergich offenlich mit disem brief fúr mich vnd fúr alle || min erben vnd nachkomen vmb die ansprach, so ich hatte zů disen nachgenemten lúten V^olrichen dem Sennhuser, Bertholten dem Sennhuser, Annun siner elichen || wirtinnen, Johansen dem Sennhuser gebrůdern, Ma^echthilten siner elichen wirtinnen, Adelhaiten der Sennhuserun iro swo^ester Walthers Kellers von Gainwille² || elichen wirtinnen vnd zů allen den kinden, so sú ietz hant oder noch von inen koment vnd geborn werdent, das ich mich darumb nach wisem rat miner frúnd vnd ander erber lút mit erber vnd gůter kuntschaft erfarn hab, daz ich zů den vorgenemten lúten noch zů iren kinden, die sú ietz hant oder noch von inen koment vnd geborn werden, zů ir liben noch zů ir gůt enkain reht han noch hienach gewinnen mag, vnd daz die selben lút aigenlich mit allen rehten zů dem gotzhus ze sant Gallen geho^erent. Darumb so hab ich mich mit gůter vorbetrahtung vnd beschaidenhait fúr mich fúr alle min erben vnd nachkomen enzigen vnd enzih mich mit disem brief gen dem erwirdigen minem gena^edigen herren abt Georien von gottes genaden abt des gotzhus ze sant Gallen³ gen allen sinen nachkomen vnd gen dem selben gotzhus aller aigenschaft aller lehenschaft aller gewer aller besatzung aller kuntschaft aller zúgnúst lút vnd brief aller frihait aller gesetzt vnd gewonhait alles rehten gaistlichs vnd weltlichs gerihtes aller vordrung vnd ansprach, so ich min erben vnd nachkomen an den vorgenemten V^olrichen dem Sennhuser, Bertholt dem Sennhuser, Annun siner elichen wirtinnen, Johansen dem Sennhuser, Ma^echthilten siner elichen wirtinnen vnd Adelhaiten der Sennhuserun iro swo^ester vnd zů allen den kinden, so sú ietz hant oder noch von inen koment vnd geborn werdent, es sien tochtran oder sún, zů ir lib ald zů ir gůt ald daran hatten oder von dehainerlay sach wegen hernach iemer gehan gewinnen oder erwerben mo^echten, damit wir die vorgenemten lút ald iri kind an ir lib ald an ir gůt bekúmberren vftriben vnd angesprechen mo^echten in dehain wis oder in dehainen weg. Vnd dez ze ainer warhait henk ich Walther von Bichelse da vorgenemt min insigel fúr mich vnd fúr alle min erben vnd nahkomen an disen brief. Der geben ist ze Bichelse in dem jar, do man zalt von gottes gebúrt drúzehenhundert jar, sechzig iar vnd darnach in dem ersten jar, an dem na^ehsten zinstag vor sant Michahels tag.

Source Fulltext: Chartularium Sangallense VII, Nr. 4763, S. 564-565.