Ich Johans von Zwingenstein¹ ritter vergich vnd tůn kunt offenlich mit disem brief allen, die in sehent lesent oder ho^erent lesen, das ich mit gůter vorbetrachtung durch mins redlichen nutzes willen úberein chomen bin mit dem || edeln wolerbornen herren hertzog Friderichen von Tekch² der hochgebornen fúrsten hertzog Růdolfs vnd sinr gebrůder der hertzogen von O^ester(rich)³ etc. houptman vnd lantuogt ze Swaben vnd in Elsazz, daz ich im in namen || vnd an statt der vorgenanten miner herren von O^ester(rich) mit min selbers libe vnd mit zwein erbern mannen zů mir vnd mit miner vesti Zwingenstein vnd mit allen minen lúten wider die von End⁴ vnd ir helfer vnd diener || sunderlich vnd wider allermenklichen, nieman vsgenomen denn allein den edeln herren graf Růdolfen von Veltkilch⁵, die wile ich sin diener bin, getrewlich warten vnd dienen vnd im die vesti Grimmenstein⁶ in miner kost bewarn vnd behu^eten sol ein gantzes jar, das nu an dem nechsten sant Gallen tag nach der dat ditz briefs anvahen sol. Vnd sol er mir in dem namen als da vor darvmbe geben fúnfhundert phunt haller, der er mir zwei hundert phunt richten vnd weren sol vff den nechsten sant Johans^a) des Ewangelisten ze wiennechten, der nu schierest kumpt, oder ee, vnd die v´brigen drúhundert phunt haller sol er mir dar nach vff den nechsten sant Johans tag des To^eiffers ze súngichten, als er geborn wart, richten vnd geben, oder ee, ane geuerde. Vnd des ze merer sicherheit hatt er mir ze rechten búrgen vnd giseln gesetzt vnd geben die edeln vesten graf Heinr. von Nellenburg⁷, Markwarten von Růda⁸, Johans Wernher Vorkilchen⁹, Růdolfen von Trosperg¹⁰, Petern von Gru^enenberg¹¹, Růdolfen den Húrus von Scho^enow¹², Go^etzen Múller¹³ von Zúrich, V^olrichen Wernhern vnd Walthern von Búttikon¹⁴, Johansen von Langenhart¹⁵ vnd Cůntzen von Stoffeln¹⁶ die all gelobt vnd gesworn hant zů den heiligen, wer daz mir die vorgenanten fúnfhundert phunt haller zů den ziln, als vor bescheiden ist, nicht verricht noch gewert wurden, daz si sich denn nach miner manung inrent den nechsten acht tagen alle gemeinlich vnd vnuerscheidenlich ieklicher mit sin selbers libe oder ein erbern knecht an sin statt antwirten su^ellent gen Kostentz gen sant Gallen oder gen Stein¹⁷, in welche der driier stetten es ir ieklichem aller komlichest ist, in offener wirte húser ze veilem gůt vnd nach der statt recht daselbs vff des obgenanten mins herren von Tekch kosten giselschaft leisten ane vnderlazz als vil vnd als lang, vntz die zweihundert oder die drúhundert phunt haller, dar vmbe ich denn gemant han, verricht vnd gewert werdent gentzlich ân geuerde. Wer ouch, ob der vorgenanten búrgen keinr abgieng oder zů diser burgschaft vnnútz wurde, so sol mir der obgenant min herr von Tekch nach miner manung inrent vierzehen tagen einen nútzen búrgen an des vnnútzen statt geben, der sich mit sinem briefe vmb die sach verbinde, alles des sich der abgegangen búrg verbunden hat, ane geuerde. Es ist ouch berett vnd bedingot, wer daz der obgenant hertzog Friderich von Tekch von dem ampt der houbtmanschaft vnd lantuogtye verkert wurde in dem jare, daz nu vf den nechsten sant Gallen tag anvahen sol, als vor geschriben ist, vnd min herren von O^ester(rich) oder ir lantuo^egte mich von der behusung ze Grimmenstein ouch verkerent wurden vor dem vsgang des jares, waz sich denn die erbern vesten Johans Hofmeister von Fro^vwenuelt¹⁸, Egbrecht von Goldenberg¹⁹, Peter von Gru^enenberg, Go^etz Múller von Zúrich vnd Johans von Langenhart die fúnf oder der merteil vnder in erkennent, daz mir von der vorgenanten behusung nach ergangener zit des jares nach dem vorgenanten anschlag geuallen sulle, daz er mir das ouch richt^b) vnd gebe vnd daz mir die vorgenanten búrgen dar vmb haft sin in aller wise, als vor bescheiden ist, vnd daz ouch mich des benu^egen sol, ân geuerde, also daz ich^c) doch mit miner vesti Zwingenstein vnd mit zwein erbern zů mir vnd mit minen lúten den vorgenanten minen herren von O^ester(rich) vnd iren lantuo^egten vnd amptlúten daz jar vollus zů allen iren no^eten warten vnd dienen sol, als vor geschriben stat, vnd sullen mir dar vmb sunderlich von den vorgenanten fúnfhundert phunden werden vnd geuallen zwei hundert phunt haller. Was ich ouch in der obgenanten minr herren von O^ester(rich) vnd in ir lantuo^egten dienst in dem vorgenanten jare redlicher vnd wissentlicher verlust nime an rossen vnd an hengsten, das sol mir ouch der obgenant min herr von Tekch ouch gebunden sin vszerichtend nach erkantniss der vorgenanten fúnfer oder des meren teils vnder in, vnd sol mich des ouch wol von in benu^egen vnd dar vmb an in fúrbazzer nit sprechen. Mo^echte aber ich die vorgenanten fúnf alle ze sament nicht bringen^d), mag ich denn zwen vnder in haben, welch die sint, die hant gewalt, einen dritten zů in ze nemen vnd sich dar vmb ze erkennende. Vnd wes sich denn die selben driie oder der merteil vnder in vmb die vorgenanten sachen erkennent vnd den egenanten min herren von Tekch gen mir tůn heissent, das sol er tůn, vnd sol ouch mich des von im benu^egen in aller wise, als ob die obgenanten alle fúnfe oder der merteil vnder in sich dar vmb erkent hettent, ane geuerde. Wer ouch, daz der egenant min herr von Tekch in dem namen als da vor min vnd miner dienern in der vorgenanten zit anderswa denn an den vorgenanten stetten ze reisende oder andern diensten bedurfent wurden, des sullen ich vnd min diener im gehorsam sin, vnd sol er vns kost geben, als er denn ze mal andern sinen dienern tůt, âne geuerde. Ich han ouch gesworn ein gelerten eid zů den heiligen, den obgenanten minen herren von O^ester(rich) vnd iren lantuo^egten vnd amptlúten das vorgenant jar vollus getrew vnd gewer ze sinne, allen iren nutz vnd êr ze fúrderren vnd schaden ze wendende heimlich vnd offenlich in allen sachen vnd wider allermenklichen, als vor bescheiden ist, vnd súllent si mich da wider ouch in allen sachen schirmen versprechen vnd halten als ander ir diener an geuerde. Vnd des vnd aller vorgeschribener sach ze warem vrkúnt han ich der obgenant Johans von Zwingenstein min eigen ingesigel offenlich gehenkt an disen brief. Der geben ist vor Grimmenstein²⁰, an dem nechsten dornstag nach sant Francisci tag, nach gots gebúrt tusent drúhundert vnd sechszig jaren vnd dar nach in dem ersten jare.

Source Fulltext: Chartularium Sangallense VII, Nr. 4764, S. 565-567.