Wir Geori von gottes gnâden abt¹ vnd daz cappittel gemainlich dez gotzhus ze sant Gallen kúndent offenlich mit disem brieue fúr vns vnd alle vnser nâchkomen allen, die in ansehent lesent oder ho^erent lesen, daz wir mit gůter vorbetrahtung vnd ainhelleklich mit gemainem rât den wolerbornen grauen Cůnrat von Fúrstenberg² vnd fro Adelhaiten geborn von Griessenberg³ siner êlichen hûsfro^vwen durch ir ernstlichen bett willen gunnen vnd verhengt habent vnd gunnen vnd verhengen mit disem brieue, daz sie der wolerbornen fro^vwen fro Clementun⁴, hern V^olrichs von Clingen⁵ êlichen hûsfro^vwen, der vorgenemten fro Adelhaiten êlichen tohter⁶, vnd Diethelmwalther, Elsbethun vnd Adelhaiten der selben fro Clementun kinden, die si bi dem êgenemten hern V^olrich von Clingen ir elichen man do hatt, ain hofstat vff der alten Toggenburg⁷ vnd diz nâchgeschriben ja^erlich gelt, daz von vnserm gotzhûs mit vnd zů der selben hofstat reht burgsa^ess ist, ze Batzzenhait⁸ sechs vnd drissig mutt vnd zwai viertail kernen vnd fúnf malter habern vnd drissig schilling vnd drithalben schilling pfenning Costentzzer múnse, ze Rikkenbach⁹ drissig mutt kernen vnd vsser aines abtes ze sant Gallen kamer zehen pfunt wachses, reht vnd redlich versetzt hant vmb hundert mark vnd vmb zwainzig mark silbers Costentzzer gewihtes ze ainem rehten gewerten pfande vnd o^vch in dem rehten, gescha^ech daz die vorgenemt fro Clement vnd dú êgenemten irú kint vor den obgenemten grauen Cůnrat vnd fro Adelhaiten siner êlichen hûsfro^vwen baiden oder vor ainem vnder in ab sturbint, so sol daz selb vorgeschriben pfant vnd daz vorgeschriben gelt den selben êgenemten grauen Cůnrat vnd fro Adelhaiten siner êlichen hûsfro^vwen baiden oder ainem, daz dann vnder in zwain die obgenemten fro Clementun vnd die êgenemten irú kint v´berlebt hânt, gantzlich mit allen rehten ledig vnd lôs sin, als ob daz selb gelt der selben fro Clementun vnd den êgenemten iren kinden nie versetzt wa^er. Gescha^ech aber, daz daz vorgeschriben pfant an die êgenemten fro Clementun ald an dú egenemten irú kint geuiel, als vorgeschriben stât, wenn wir der vorgenemt abt Geori ald vnser nâchkomen ald daz cappittel dez vorgeschribenen gotzhûs denn daz vorgeschriben pfant burgsa^ess vnd gelt von in ald iren erben, ob sú enwa^erint, mit hundert vnd zwainzig mark silbers lo^esen wellent, darzů súllent wir alwent weg vnd reht han, also weles jares wir lo^esen wellent, daz wir daz vor sant Johans tag ze súngihten súllent tůn, won lôstin wir dehaines jâres nâch sant Johans tag ze súngihten, so wa^er der nutz von dem vorgeschribenen pfant der êgenemten fro Clementun vnd den êgenemten iren kinden oder iren erben, ob sú enwa^erint, dez jâres geuallen. Vnd ist diz alles beschehen mit allen den worten vnd werken, so darzů gehortent vnd nôtdurftig wârent von reht vnd von gewonhait. Vnd dez alles ze ainer gantzzer sicherhait so habent wir abt Geori vnd daz cappittel da vorgenemt vnser vnd vnsers conuentes insigel gehenkt an disen brief. Wir die obgenemten graf Cůnrat von Fúrstenberg vnd fro Adelhait geborn von Griessenberg dez selben grauen Cůnratz êlichi hûsfro^vw veriehent offenlich an disem brieue ainer gantzzer wârhait aller der vorgeschribenen dinge vnd gedinge. Vnd ze mêrer sicherhait der selben dinge vnd gedinge so haben wir o^vch v´nserú insigel gehenkt an disen brief. Der geben ist ze sant Gallen in dem closter an der na^ehsten mitwuchen nâch v´nser fro^vwen tag ze o^vgsten in dem jâr, do man zalt von gottes gebúrt drúzehenhundert jâr vnd darnach in dem ain vnd sehszigosten jâre.

Source Fulltext: Chartularium Sangallense VII, Nr. 4758, S. 561-562.