Allen, die disen brief ansehent oder ho^erent lesen, kúnden wir Gerwig, Eglolf vnd Albreht die Blarer || gebrůder burger ze Costentz vnd vergehin offenlich an disem brief, das wir von den erwirdigen in gotte vnd || gaischlichen frowen fro Katherinen a^ebtissen vnd dem conuent gemainlich des gotzhus ze Maggnowe¹ des ordens || ze Zytels enpfangen habin a^ehtú vnd zwainzig pfund gůter pfenning Costentzer múns, der wir gar von inen gewert sigin vnd die wir in v´nsern redlichen nutz bewendet vnd geben habin, als wir vergehin mit disem brief, vnd das wir inen vnd dem selben irem conuent vnd dem gotzhus vmb die selben pfenning habin ze kôffent geben fúr reht aigen den hof in Rindal², den man nemmet das Brugg gůt³, vnd das Bachlen³, das an der kilchen gůt von Jonswile⁴ vnd an der klosterherren gůt von sant Gallen gelegen ist, vnd was zů den selben gu^etern ho^eret, es sie mit wasen mit zwi mit waide mit holtz mit veld mit wisen mit akkern mit wegen mit stegen mit wasser mit wasserlaiti mit allen nútzen vnd gewonhaiten vnd mit allen rehten, als dú selben gu^eter an v´ns komen vnd braht sint vnd als wir si gehept vnd genossen habin her vntz an disen hútigen tag, also vnd mit den selben rehten habin och wir inen dú selben gu^eter mit aller ir zůgeho^erde gefertget vnd vff geben fúr reht aigen vff offener lantstrasse des richs mit allen den worten werken vnd geta^eten vnd mit aller kraft, so darzů hort vnd nottúrftig was nach gewonhait vnd nach reht. Vnd habin v´ns darúber verzigen vnd verzihin v´ns offenlich mit disem brief fúr v´ns vnd fúr alle v´nser erben vnd nachkomen gen den vorgenanten fro Katherinen a^ebtissen vnd gen dem conuent vnd gen irem gotzhus ze Maggnowe vnd gen allen iren nachkomen an den vorgenanten gu^etern vnd was darzů ho^ert aller aigenschaft aller lehenschaft aller vordrung aller ansprach vnd alles v´nsers rehtes gaischlichs vnd weltlichs gerihtes, da mit wir dú selben gu^eter nu ald hernach gar ald an dekainem tail kúndin ald mo^ehtin angesprechen. Wir vnd v´nser erben so^elin och iro vnd ir gotzhus der selben gu^eter vnd was darzů ho^ert reht wern sin nach reht ane alle geuerde fúr reht aigen, als vorgeschriben stat. Vnd ze warem vnd offem vrkúnd aller dirr vorgeschriben ding gebin wir die selben Gerwig, Eglolf vnd Albreht die Blarer gebrůder fúr v´ns vnd alle v´nser erben vnd nachkomen der selben fro Katherinen a^ebtissen vnd dem conuent vnd allen iren nachkomen darúber disen brief mit v´nsren aignen insigeln besigelten, dú wir a^ellú drú offenlich daran gehenkt habin. Der brief ist ze Costentz geben, do man von Cristes gebúrt zalt drúzehenhundert jar, darnach in dem ain vnd sehtzigosten jar, an dem na^ehsten fritag vor aller hailgen tag.

Source Fulltext: Chartularium Sangallense VII, Nr. 4765, S. 567-568.