Wir Karl von gots gnaden Romischer keiser zu allen czeiten merer des reichs vnd kunig zu Beheim bekennen vnd tun kunt || offenlich mit diesem brieff allen den, die yn sehen oder horen lesen, wann die edlen graf Albrecht der alte vnd graf Albrecht der || junge von Werdemberg³ vnd ire kind vnser vnd des reichs lieben getrewen die stat zu Altsteten⁴, den kelnhoff doselbist, den keln||hoff zu Marbach⁵ vnd den kelnhoff zu Perenank⁶ mit allen iren zugehorungen vnd alle die gut, die yn dem Ryntal⁷ oben vnd nyden gelegen sint, von vns vnd dem reich in pfantschaft gehabt haben vnd die furbaz der edlen Agnesen⁸ des egenanten grafen Albr. des jungern elichen wirtinne vnser lieben můmen vmb funfczehenhundert pfunt Kostniczer pfenninge verseczet haben, dez haben vns die egenanten grafen demuteclich gebeten, daz wir des egenanten gelts vff der vorgenanten pfantschaft derselben vnser mumen bekennen geruchen. Des haben wir angesehen ir fleizzige bete vnd auch sunderliche liebe, die wir zu der egenanten vnser mumen haben, vnd bekennen ir vnd iren erben derselben funfczehenhundert pfunt Kostniczer vff der egenanten stat vnd kelnhofen, also daz sie die mit gerichten nuczen gulten vnd allen andern iren zugehorungen, wie man die mit besundern Worten benennen mag, als lange innehaben nuczen vnd niezzen sullen, biz daz wir oder vnser nachkomen an dem reich oder die egenanten graf Albrecht der alte oder graf Albr. der junge oder ir erben die egen(ant) stat vnd kelnheff vnd gut vmb die vorgen(ant) summen gelts widerlosen werden. Mit vrkund dicz briefs, versigelt mit vnser keiserlichen magestat insigel. Der geben ist zů Nuremberg nach Crists geburt dreuczenhundert jar, darnach in dem drew vnd sechczigisten jar am donerstag nach dem suntag Reminiscere, vnser reiche in dem sibenczenden vnd des keisertums in dem achten jare.

Source Fulltext: Chartularium Sangallense VIII, Nr. 4861, S. 71-72.