Ich Walther von der Hohen Klingen¹ frije lantrichter in Thurgo^vw der grafschaft von Kyburg² tůn kunt allen, die disen brief sehent oder ho^erent lesen, daz ich in der vorgenanten grafschaft || an dem lantgerichte, daz man nemmet ze der Lo^vben³, offenlich ze gerichte sass des ne^achsten donrstags vor dem balmtag, vnd kamen da fúr gerichte die fromen lúte herr Herman, herr || Beringer, Herman gebrůdere, V^olrich ir vetter, alle genemmet von Landenberg von Griffense⁴, ze ainem tail vnd dú gaistlich fro^vwe dú . . e^aptischenn des klosters ze Maggno^vw⁵ an ir vnd ir || conuentes statt gemainlich des selben klosters des ordens von Zitel gelegen in Costentzerre bistům ze dem andern tail, vnd offenten da die obgenanten von Landenberg, daz si nach iro frúnde rat mit gůtter vorbetrachtung vnd ainhelleklich mit in selber ze rate worden weren, durch daz si grosses schaden entladen wurden vnd ir swe^aren gúltan, da schad vf gienge, abgerichten mo^echten, daz si dar vmb ainhelleklich vnd vnuerschaidenlich der . . e^aptischenn den klosterfro^vwen vnd dem conuent gemainlich des vorgenanten klosters ze Maggno^vwe recht vnd redlichen vnd ane alle geuerde ze ko^vffenne gegeben hettend fúr recht ledig aigen den hof ze Kalchouen⁶ gelegen obrunt dem kloster ze Maggno^vwe, dar in der kilchensatz ze Obern Glat⁷ mit lehenschaft der kilchen von alter in geho^eret hat vnd noch dar ine geho^eret, vnd gaben inen da selben vor gerichte o^vch den selben hof ze Kalchouen ze ko^vffenne mit allen des selben houes ze Kalchouen rechten vnd zůgeho^erungen, mit den widmen ze Obern Glatte vnd ze Flawille⁸, mit andern rechten vnd zůgehorungen, wie die genant sint vnd war an die gelegen sint, vnd gemainlich mit allen des selben houes ze Kalchouen vnd siner zů geho^erde gúltan nútzen ackern wisan ho^eltzern ve^alden vo^ersten waiden wassern wasser rúnsen gewonhaiten vnd andern rechten, wie die genant sint, vnd o^vch mit disen nachbenemmeten lúten, die darzů vnd dar in geho^erent, vnd sint dis die lúte Elzbethe Kalchouerin von Burgo^vw⁹ vnd irú kint, ir swester Adelhait Kalchouerin von Burgo^vw vnd irú kint, Adelhait Ko^echin von Baldenwille¹⁰ vnd irú kint, Anna Adelhaiden der Kalchouerinen tochter von Swarzenbach¹¹ vnd irú kint, Mechthilt Kalchouerin von Bischofzelle¹² vnd irú kint, Cu^eni Kalchouer von Bischofzelle vnd alle der selben kilchen aigennen lúte benemmet vnd vnbenemmet vnd in aller der wise, als sú die selben gu^etter vnd lúte ankomen weren vnd sú gemainlich geerbt hetten von irn ve^attern seligen. Vnd hant si dien klosterfro^vwen des vorgenanten klosters dú gu^etter vnd lúte, als vorbeschaiden ist, in aines redlichen ko^vffes wise gegeben vmb vier hundert phunt vierzig phunt drú phunt vnd fúnfzehen schilling phenning Costentzerr múntz genger vnd ge^aber, der sú gantzlich von in gewert sint vnd in ir bewerten nutz verkeret hant, des si vor gerichte veriahen. Vnd baten in die obgenanten von Landenberg erfarn an ainer vrtail, wie si der eptischenn vnd dem conuent des vorgenanten klosters ze Maggno^vw vnd irem kloster dú vorgenanten gu^etter vnd lúte vertigen vnd vfgeben so^elten, da mit si vnd ir kloster vnd ir nachkomen besorgt weren vnd daz es o^vch nu vnd hernach kraft hette. Da fragte ich vrtail vmbe, do wart ertaillet mit gesamnoter vrtail ainhelleklich, sit si dú gu^etter geerbet hetten, als vorgeschriben stat, vnd ir gemain aigen weren, daz si sich danne der selben gu^etter vnd lúte vnd alls rechten, so si darzů hettin, da vor dem gerichte mit gelerten Worten an der egenanten eptischenn hand zů ir vnd ir conuentes vnd ir nachkomen handen gemainlich des vorgenanten klosters ze Maggno^vwe wol verzihen vnd vfgeben mo^echten vnd o^vch der selben gu^etter vnd lúte wer sin so^elten nach rechte fúr ledig aigen, vnd als bald dú vertigunge also volgienge, daz es danne billich nu vnd hernach kraft hette vnd daz die selben klosterfro^vwen vnd ir gotshus da mit wol besorgt weren. Vnd do dú vrtail also vor mir geuiel vnd gesprochen wart, do stůnden die vorgenanten von Landenberg alle vier dar fúr gerichte vnd verzigen sich recht vnd redlich mit gelerten worten, als gerichte vnd vrtail gab, an minen des vorgenanten richters stab vnd an der egenanten eptischenn hand zů ir vnd ir klosterfro^vwen vnd des conuentes vnd nachkomen wegen gemainlich des klosters ze Maggno^vw der vorgenanten gu^ettern vnd lúte mit allen iren rechten gewonhaiten nútzen vnd zůgeho^erden, wie si genant sint. Vnd erkanden die vorgenanten von Landenberg fúr sich vnd ir erben, daz der kilchensatz vnd daz recht ze lihenne die kilchen ze Obern Glatte mit allen iren nútzen vnd zůgeho^erungen mit sampt dem vorgenanten hof ze Kalchouen eweklich angeuallen sint ane mennlichs ansprach vnd widerrede die vorgenanten fro^vwen dú eptischenn vnd den conuent ze Maggno^vw vnd daz selb ir kloster, vnd daz sú noch ir erben mit dem selben kilchensatze vnd lehennrechte vnd ir zůgeho^erden fúrbas nit ze tůnne noch ze schaffenne haben so^elnt. Vnd dar vmb so verzigen si fúr sich iro erben vnd alle ir nachkomen zů der vorgenanten fro^vwen der eptischenn vnd des conuentes vnd irs klosters handen aller rechte, die si vntz her gehebt hant oder iemer gewinnen mo^echten an dem vorgenanten hof ze Kalchouen vnd an dem kilchensatze vnd an aller ir zůgeho^erden, wie die genant sint. Die obgenanten von Landenberg hant o^vch die selben fro^vwan vnd ir kloster gesetzet vor gerichte vnd mit miner des vorgenanten richters hand in recht gewer der vorgenanten gu^ettern des houes ze Kalchouen, des kilchensatzes ze Obern Glatte, der vorgenanten lúte vnd allr ir zůgeho^erden, vnd wellent, daz die selben fro^vwan ir nachkomen vnd ir kloster den oftgenanten hof ze Kalchouen vnd den selben kilchensatz mit allen iren zůgeho^erden frilich eweklich haben besitzen vnd niessen súlnt vnd da mit tůnde sijen, was inen fůglich ist. O^vch widersagten vnd verzigen sich da die vorgenanten von Landenberg fúr sich alle ir erben vnd nachkomen allen fúrzugen frihaiten briefen vnd rechten der be^abste vnd der kayser vnd allr hilf gaistlichs vnd we^altlichs gerichts, da mit der vorgenante ko^vff mit siner zůgeho^erde vnd getat oder kain vorgeschriben ald nachgeschriben stuk kainenweg mo^ehten geirret oder bekrenket werden. Die obgenanten von Landenberg lopten o^vch da vor gerichte fúr sich vnd alle ir erben vnd nachkomen, der vorgenanten lúte vnd gu^ettern vnd ir zůgeho^erden recht wer ze sinde nach rechte fúr ledig aigen wider alle ansprach, wo des dú eptischenn vnd der conuent des klosters ze Maggno^vwe oder ir nachkomen notdúrftig sint vff gaistlichen vnd we^altlichen gerichten, ane geuerde. Vnd des alles ze vrkúnd vnd sicherhait hab ich der vorgenant richter, als mir vor gerichte ertaillet wart, des lantgerichtes ingesigel in^a) Thurgo^vw gehenket an disen brief. Wir die vorgenanten herr Herman, herr Beringer, Herman gebrůdere, V^olrich ir vetter alle vier genant von Landenberg von Griffense vergehen o^vch an disem brief, daz wir allú dú ding, so vor vmb dis sach von v´ns an disem brief verschriben stant, recht vnd redlich erkennet getan vnd vns verbunden hant in aller der wise vnd in dien rechten, als vorbeschaiden ist. Vnd ze ainem offennen vrkúnd der warhait vnd meren sicherhait allr dirre sach hat vnser ieglicher sin aigen ingesigel zů des vorgenanten lantgerichts insigel gehenkt an disen brief. Der geben wart an dem lantgerichte ze der Lo^vben des vorgeschriben donstages, do man zalte von gotts geburt drúzehenhundert vnd sechtzig iar, darnach in dem dritten iare.

Source Fulltext: Chartularium Sangallense VIII, Nr. 4865, S. 75-77.