Allen den, die disen brief ansechent oder ho^erent lesen, kúnd ich Liechtistein von Haldenstein¹ vogt der stat ze Cûr vnd vergich offenlich mit disem brief, || daz fúr mich kament an offen gerichte, da ich an offenr friier des richs lantstrasse offenlich ze gerichte sass, die edel wollgeborn fro^vw fro Vrsella geborn || von Vatzz grauin von Werdenberg von Sanegans² vnd der edel herre graf Johans³ ir sun vnd offenotent mit fúrsprechen vor mir vor gericht, si werent || eines rechten redlichen ko^vffes v´ber ein komen mit dem edelen herren graf Friderichen von Thoggenburg dem eltern⁴ vnd mit der edelen wolgebornen fro^vwen fro Kúngúnden gebornen von Vatzz grauin von Thogenburg⁵ vnd mit allen iren kinden vff einen widerko^vff vmb als vil gůtz vnd vf so vil tag, als^a) die brief, die dar vmbe von des selben ko^vffs wegen geben werdent, wol bewisent, vmb dz tal, dz geheissen ist Schanfigg⁶, lút vnd gůt, als die ko^vff brief⁷ sagent werdent. Vnd battent in an einr vrteild ze ervarn, wie si sich des selben gůtz entziehen vnd vf geben so^eltent vnd in der vorgen(anden) herren von Thoggenburg vnd fro Kúngúnden hend bringen so^elt, als recht were vnd nv vnd hie nach kraft hette. Vnd da ward mit gerêchter gesamneter vrteild erteilt vf den eid, dz dv´ obgen(ant) fro^vw fro Vrsella greuin von Werdenberg von Sanegans einen vogt nerne, wen si wo^elte, vnd dz si sich mit ir vnd mit des selben ir vogtz hand des vorgeschriben gůtz Schanfigge entzige an des gerichtes stab vnd dz selb der egenant graf Johans o^vch tete, daz tett o^vch da ze mal die obgen(ant) fro^vw fro Vrsella grauin von Werdenberg von Sanegans vnd erko^vsse ze vogt v´ber dis sache V^olrich von Haldenstein⁸ vnd entzeche sich fúrbass nach der vrteild mit ir vnd mit irs vorgenanden erkornen vogtz henden vnd der egenant graf Johans mit sin selbs hande an des gerichtz stab, als in dz recht vnd vrteild geben hatt, vnd brachtent es fúrbass von des gerichtz stab in des obgenanden edelen herren von Thoggenburg, fro Kungúnden grauin siner elichen wirtennen vnd in ir kinden hende, als recht vnd vrteild geben hat. Vnd des ze einem wâren offen vrkúnde der vorgeschriben dingen so gib ich der obgenant vogt Liechtistein von Haldenstein durch ernstlicher bett willen der vorgeschribenen beider teilen min insigel an disen brief, dz ich von des gerichtes wegen vnd von recht tůn sol vnd mir dar vmbe erteilet ward. Dis geschach vnd ward dire brief geben ze Cûr in der stat, da man zalt von gottez gebúrt drúzechen hundert jar vnd dar nach in dem drú vnd sechtzigosten jare, an der nechsten mitwuchen vor dem balm tag.

Source Fulltext: Chartularium Sangallense VIII, Nr. 4864, S. 74-75.