Allen, die disen brief sehent oder ho^erent lesen, kúnd ich Ru^edger Maness ritter burgermeister¹ vnd wir der nachgeschriben || rat vnd die zûnftmeister der stat Zúrich, das Peter von Dienberg² burger ze Kyburg³ sin gůt ze Ottikon⁴ || gelegen, daz Brendli bûwet vnd man nemt der hoflúten gůt, giltet ja^erlich fúnf mút kernen zwei malter habern Winter||tûrer messes⁵ sechs schilling pfennig zwei herbst hu^enr zwei vasnachthu^enr vnd fúnfzig eijer^a), mit husern mit hofstetten mit holtz mit veld mit akern mit wisen mit wûnn mit weid mit steg mit weg vnd mit aller rechtung friheit vnd ehafti, so darzů geho^ert, recht vnd redlich ze ko^vffenn geben hat fúr ledig frij eigen dem erwirdigen herren hern Brûn Brûnn probst der kilchen Zúrich⁶ ze dez altars wegen der heiligen drij kúngen, der in der selben kilchen vff dem gewelb gelegen ist, des stifter Hug Senger selig was, vmb hûndert guldin vnd vmb vier guldin alles gůter vnd genger Florener, dero der vorgenant Peter von Dienber^b) nach siner vergichte mit voller gewichte von dem egenanten hern Brûn Brûnen probste gar gewert ist. Vnd darumb so hat sich der selb Peter von Dienberg enzigen alles rechten vordrung vnd ansprach, so er oder sin erben, die er herzů bind(et)^c), mit geistlichen oder mit weltlichen gerichten oder mit keinen andern sachen iemer gewinnen mo^ehtin nach dem obgenanten gůte ze Ottikon mit allem recht, so darzů geho^ert, gen dem vorgenanten altar vnd gen allen sinen nachkomen, an all geuerd. Er hat o^vch mit gůten trúwen gelopt fur sich vnd sin erb, dez vorgeschriben gůtes ze Ottikon mit allem recht, so darzů geho^ert, nach recht wer ze sinne fúr ledig frij eigen vnd vmb den vorgeschriben ko^vffs^b) dez vorgenanten alltars vnd aller siner nachkomen vor geistlichen vnd vor weltlichen gerichten vnd an allen den stetten, so si sin notdúrftig sint, an^d) all geuerd. Vnd herúber won wir dis horten vnd sahen, so haben wir ze vrkúnd vnser stat insiggel^e) offenlich gehenket an disen brief. Vnd ich der obgenant Peter von Dienberg vergich einer warheit vmb alles, daz hie von mir geschriben stat, vnd darumb so han ich min insigel zů der stat Zúrich insigel o^vch offenlich gehenket an disen brief. Der geben ist an sant Mauricijen abent in dem jare, do man von gottes gebúrte zalte drúzehenhundert vnd sechzig jar vnd darnach in dem dritten jare. Vnser des rates namen sint V^olrich Maness, Kraft Biber, Jacob von Wengi⁷, Růdolf Brûn, Herman Maness, Eberhart Brûn, V^olrich Swend, Burkhart von Seon⁸, meister Niclaus arzat, Růdolf Meijer, Heinrich Truber, Heinrich Meiso vnd Rudolf Mûrer. Der zûmftmeister namen sint Johans Seiler, Johans Kůntz, Johans Zaffner, Johans Diethelm, Berhtolt Schúrmeijer, Johans Graser, V^olrich Obrest, Simon Binder, Niclaus von Spyr, Johans Ru^enili^b), Růdolf Grauo, Johans Stettler vnd Johans Steinimûr.

Source Fulltext: Chartularium Sangallense VIII, Nr. 4899, S. 100-101.