Allen den, die disen briefan sehent lesent oder ho^erent lesen, kúnd ich Ba^ertelli Niesseli vogt ze Swarzenbach¹ vnd vergih offenlich mit disem brief, das fúr mich kâm || ze Ramsperg² in dem hof, da ich offenlich ze geriht sass an mines gena^edigen herren stat graf Cůnratz von Fúrstenberg³, ze ainem tail dú erwirdig || frôw frô Katherina dú a^ebtischinna dez gotzhus ze Magnôw⁴ vnd ze dem andern tail Adelhait dú Stetterin, Hainrich ir sun vnd swo^ester Adelhait vnd aber || Adelhait, Cůnrat Ratolfs sa^eligen elichú husfrôw, geswo^esteran vnd der vorbenempten Stetterinen elichen tohteran, vnd stalten sich baidenthalb mit fúrsprechen vnd namen da die vorbenempten Adelhait Stetterin vnd dú egenempten irú kind a^ellú gemainlich ze fúrsprechen Johans den Bo^eschen burger ze Wil⁵, vnd offenôt der von iro wegen vnd an ir stat, das sú a^ellú gemainlich vnd vnuerschaidenlich redlich vnd reht verkoffet vnd ze kôffenne geben hettin der vorbenempten frô Katherinen vnd dem conuent gemainlich ze Magnôw vnd ir nachkomen alle die reht rehtung vorderung vnd ansprach, so sú an dem zů dem von des hofes wegen ze Kalchhofen⁶ ie gehan hettint ald noch gewinnen mo^ehten, vmb vierz[. . .]^a) pfunt pfenning alles gůter Costenzer múns, dero sú gar vnd gantzlich von inen gewert wa^eren, vnd wolten inen ôch das vertegôn vf geben vnd enzihen fúr sich vnd alle ir erben nach dem rehten, wie sú daz tůn solten, daz es kraft vnd maht hett vnd haben mo^eht nu vnd her nach. Do fragt ich obgenander rihter vmb, do wart ertailt mit gesamnoter vrtail, daz die vorbenempten Adelhait dú Stetterin, Adelhait vnd aber Adelhait ir tohteran dez ersten solten stan mit iro vo^egten, vnd wenn sú beuôgtot wúrden, daz sú dann ir vo^egt, die inen ze uo^egt ertailt wurden, solten fu^eren dristund vss dez gerihtes ring vnd sie solten fragen ze dem dritten mal, ob sú das gern vnd vnbetwngenlich ta^eten vnd ôch tůn wolten, vnd wo sú ôch saitin ze dem dritten mal bi iren aiden, daz sú daz gern vnd vnbetwungenlich ta^eten vnd och tůn wolten, vnd sú ôch a^ellú vierú gemainlich mit iro vnd iro vo^egten handen dar giengen vnd griffen an dez rihters stab vnd da ledeklich vf ga^ebin vnd sich enzigen an den stab hin zů der vorbenempten frô Katherinen a^ebtischinnen vnd dez gemainen conuentes handen ze Maggenôw, daz daz wol kraft vnd maht hetti vnd haben mo^eht. Do baten mich die vorbenempten frôwen eruarn, wer von reht iro vo^egt wa^eren vnd solten sin. Do fragt ich vmb, do wart ertailt, daz Adelhait dú Stetterin ze uôgt nemen solte iren na^ehsten vatter mag, ob si in haben mo^eht, do sait si, das si den nit haben mo^eht, do fragt ich aber vmb, was reht wa^er, do wart ertailt, daz si solte nemen ainen erkornen vôgt vmb dú sach, do nam si ze uogt Hainrich den Giel von Glattburg⁷, vnd beuôgtôten sich ôch die egenempten ir tohteran mit Hainrich dem Stetter irem brůder, die vogtyg ich inen baiden verleh nach dez landes sitten vnd gewonhait, vnd namen aber da sú vnd ir uo^egt ze fúrsprechen aber Johansen den Bo^eschen, der vorbenempt ist, vnd namen ôch da die vorbenempten ir uo^egt vnd fůrten die selben frôwen dristund vss des gerihtes ring vnd fragton sú dristund, ob sú daz gern vnd vmbetwungenlich ta^etin vnd ôch tůn wolten, die saiten bi ir ayden ze dem dritten mal, daz sú daz gern vnd vnbetwungenlich ta^eten vnd ôch tůn wolten, vnd do giengen sú ze stett a^ellú gemainlich dar mit iro vnd iro egenempten vo^egten handen dar vor offem geriht vnd griffen an den stab vnd gaben da ledeklich vf an min des rihters stab alle die reht rehtung vnd ansprach, so sú vss dem an dem vnd zů dem egenempten hof ze Kalchhôfen ie hattôn ald noch gewinnen mo^ehten, hin zů der egenempten frô Katherinen der a^ebtischinnen vnd des gemaines conuentes handen dez gotzhus ze Maggenôw, als da mit gesamnoter vrtail ertailt wart, vnd enzigen sich vnd hant sich ôch enzigen mit disem gegenwúrtigen brief aller reht rehtung vorderung aller ansprach aller aigenschaft aller lehenschaft aller manschaft alles tailes vnd gemaind aller gewer lút vnd brief alles rehten gaistlichs vnd weltlichs gerihtes, so sú von dez egenempten hofes wegen ie hattôn gewunnen ald nôch gewinnen mo^ehten, vnd daz sú nôch enkain ir erben die vorbenempten frowen dez gotzhus ze Maggnôw nôch daz gothus von des selben hofes wegen niemer me so^ellent noch wellent ansprechen noch vf triben bekúmberrôn noch bekrenken weder mit gaistlichem geriht noch an reht. Es hant ôch die vorbenempten Adelhait dú Stetterin, Hainrich, Adelhait vnd aber Adelhait irú kind gelobt bi ir trúwan, des vorgeschriben hofes vnd dez kôfs reht wernn ze sinne nach reht gen mainglichem, wenn ald wa ald wie dik die egenempten frôwen ze Maggnôw ald ir gotzhus dar vmb angesprochen geschadgôt vnd vfgetriben werdent vff gaistlichem ald vff weltlichem geriht, vnd nach dem baten mich die vorbenempt frô Katherin des gerihtes brief hie vmb, do fragt ich obgenander rihter vmb, ob ich ir den gen solte, do wart ertailt mit gesamnoter vrtail, daz ich inen die billich ga^eb vnd gen solte. Vnd dez ze ainer sicherren warhait so han ich obgenander rihter min insigel gehenket an disen brief. Wir die vorbenempten Hainrich der Giel der egenempten frowen vôgt in dirre sach vnd ich Johans der Bo^esch ir aller fúrsprech veriehen ôch ain gantz warhait aller vorgeschriben ding, vnd des ze ainer meren sicherhait so haben wir ôch v´nsri insigel gehenkt an disen brief. Der geben ist ze Ramsperg in dem hof, do man zalt von gottes gebúrt drúzehen hundert iar, sehzig iar, dar nach in dem dritten iar, an dem na^ehsten dunstag nach sant Peters tag.

Source Fulltext: Chartularium Sangallense VIII, Nr. 4886, S. 92-94.