Allen den, die disen brief an sehent lesent oder ho^erent lesen, kúnd ich Ba^ertelli Niesseli vôgt ze Swarzenbach vnd vergih dez offenlich mit disem brief, daz fúr mich kam || ze Ramsperg in dem hof, da ich offenlich ze geriht sass an mines gen^edigen herren stat graf Cůnratz von Fúrstenberg, ze ainem tail die erwirdig frôw frô || Katherina dú a^ebtischinna des gotzhus ze Maggenôw vnd ze dem andern tail Hainrich der Stetter, Cůnrat, Hainrich, Elisabetha, Katherina vnd Berchtolt || sinú elichú kind, Burkart vnd Johans gebrůder, Cůnrat Ratolfs sailigen vnd Adelhaitten wilent siner elichen husfrowen elichen sún, vnd namen da die vorbenempten kind a^ellú gemainlich ze fúrsprechen Johans den Bo^eschen búrger ze Wil, vnd offenôt der da von ir aller wegen vnd an ir stat vmb den hof ze Kalchhofen, da Adelhait dú Stetterin vnd Hainrich ir sun vnd der egenempten Cůnratz, Hainrich, Elisabethun, Katherinen vnd Berchtoltz iro rehto vatter vnd Adelhait Cůnratz Ratolfs sa^eiligen elichú husfrôw vnd des vorbenempten Burkartes vnd Johans rehtú můter alle die reht vnd rehtung vnd ansprach, so sú an dem zů dem vnd vss dem hof ze Kalchhofen ie gehatten, redelich vnd reht verkoffet vnd ze koffenne gebin hettin den erwirdigen frôwen frô Katherinen der a^ebtischinnen vnd dem conuent gemainlich dez gotzhus ze Maggenôw, aller der reht rehtung vorderung vnd ansprach, so ietwedra tail der vorbenempten kinden hettin ald noch gewinnen mo^ehten von iro vnd iro vatter vnd můter wegen zů dem selben hof, wolten sú ôch vertegôn vf geben vnd enzihen vnd zů der vorbenempten frôwen frô Katherinen der a^ebtischinnen vnd des gemainen conuentes des gotzhus ze Maggenôw handen bringen nach dem rehten, wie sú daz tůn solten, daz es kraft vnd maht hetti nu vnd her nach, Do fragt ich obgenander rihter vmb, do wart ertailt mit gesamnoter vrtail, daz dú egenempten kind solten stan mit vo^egten ze baiden tailun, vnd wenn sú beuôgtot wurden vnd sú danne a^ellú gemainlich dar giengen vnd griffen an min des obgenanden rihters stab vnd da ledeklich vf ga^eben vnd sich enzigen an den stab hin zů der egenempten frowen handen des conuentes des gotzhus ze Maggnôw mit iro vnd iro vo^egten handen, daz daz wol kraft vnd maht hetti nu vnd her nach. Do baten inen dú egenempten kind ze baiden tailn, wer von reht ir vôgt wa^er vnd sin solti, vrtail vmb ze eruarn. Do fragt ich obgenander rihter vmb, do wart ertailt mit gesamnoter vrtail, daz Hainrich der Stetter von reht Cůnrat, Hainrichs, Elisabethun, Katherinen vnd Berchtolt siner elichen kinden rehto vôgt wa^er vnd sin solte. Do namen ôch ze uôgt Burkart vnd Johans Cůnrat des Ratolfs kind wilent Johans Kûrer, vnd dar nach giengen sú a^ellú gemainlich ze baiden tailun dar mit den vorbenempten iren vo^egten vnd griffen a^ellú gemainlich mit iro vnd iro vo^egten handen an den stab vnd gaben da ledeklich vf mit gelerten worten a^ellú dú reht rehtung vorderung vnd ansprach, so sú von iro vnd iro vatter vnd můter wegen zů dem egenempten hof ie hattôn ald noch gewinnen mo^ehten, hin zů der vorbenempten frôwen frô Katherinen der a^ebtischinnen vnd des gemaines conuentes des gotzhus ze Maggnôw handen, als da mit gesamnoter vrtail ertailt wart, vnd enzigen sich da a^ellú gemainlich vnd hant sich och enzigen mit disem gegenwúrtigen brief aller reht rehtung vorderung vnd ansprach aller aigenschaft aller manschaft vnd lehenschaft aller kuntschaft alles erbes alles tailes vnd gemaind aller gewer lút vnd brief alles rehten gaistlichs vnd weltlichs gerihtes, so sú von dez egenempten hofes wegen ie hattôn ald noch gewinnen mo^ehten, vnd daz sú noch ir erben noch nieman von ir wegen die egenempten frowen des conuentes dez gotzhus ze Maggnôw sú noch ir gotzhus von des egenempten hofes wegen niemer me so^ellent noch wellent ansprechen noch vf triben bekúmberron noch bekrenken weder mit gaistlichem nôch mit weltlichem geriht noch an reht noch mit enkainen andren sachen, vnd nach dem so baten mich die egenempt frôwen frô Katherina a^ebtischinn dez gotzhus ze Maggenôw des gerihtes brief hie vmb. Do fragt ich obgenander rihter, ob ich ir die gen solte, do wart ertailt mit gesamnoter vrtail, das ich ir die billich ga^eb vnd gen solte. Vnd dez ze ainem waren vrkúnd so han ich obgenander rihter min insigel gehenket an disen brief. Wir die vorbenempten fúrsprech vnd die vo^egt veriehun och^a) ain gantz warhait aller dirre ding, vnd des ze merer sicherhait so han ich obgenander fúrsprech min insigel gehenket^b) an disen brief, vnd won wir die obgenanden vo^egt in dirre sach aigener insigel nit enhaben, so verbinden wir v´ns ze ainer warhait vnder des obgenanden rihters insigel. Dis geschach vnd wart dirre brief geben ze Ramsperg in dem hof, do man zalt von gottes gebúrt drúzehen hundert iar, sehzig iar, dar nach in dem dritten iar, an dem na^ehsten dunstag nach sant Peters tag.

Source Fulltext: Chartularium Sangallense VIII, Nr. 4887, S. 94-95.