Wir Johans von gottes gnaden abt des gotzhus ze sant Johanne¹ gelegen in dem Turtal sant Benedicten || ordens in Costentzer bistum kúnden vnd vergehen offenlich mit vrkúnd dis briefs, daz wir v´nseren ge||na^edigen herren grauf Albreht von^a) Werdenberg dem eltern, grauf Albreht dem jungern, graff || Hugen des jungern grauff Albrehtz sun von Werdenberg² gelobt hant mit v´nser trúwe an ains gesworn aides statt^b) vnd in aides wise gelopt ha^vnt, daz wir von in no^vch von iren erben niemer komen sont noch in niemer flúhtig werden sond, daz fluht haisse oder sige. Wir sond o^vch mit rehtem huse ze sant Johanne sitzen vnd sin vnd sond ainen manod von sant Johanne niemer sin, es fu^eg denne ehaft not, es si denne v´nser egenanten herrschaft guter wille vnd gunst da bi. Wir sond o^vch an iren raut kain herren enphahen. Wir sond och niemer kainen andern vogt su^echen no^vch ze vogt nemen wan v´nser egenant herrschaft von Werdenberg, die o^vch v´nser vnd v´nsers egenanten gotzhus ze sant Johanne reht ka^vst vo^egt von reht sint vnd iemer sin so^vnd. Wir sond och an kainer stat des riches stett no^vch der herren stett burger reht nemen no^vch enphahen. Were aber, da vor got si, daz wir úber fu^eren dir stuk ains oder me, da vor got si, so sol an v´nser egenanten herrschaft gnaden sta^vn, wie si v´ns an^c) a^vn gůt vnd an v´nseren lúten dar vmb straffen went, vnd sol v´ns da vor nit schirmen ander vo^egt burgerreht^d) noch frihait noch gaistlich no^vch weltlich geriht no^vch nút a^vn geua^erde. Vnd des ze vrkúnd henken wir v´nser aigen insigel an disen brief. Der geben ist an sant Katherinen abend, do man zalt von Cristus gebúrt drúzehenhundert jar vnd dar na^vch in dem drú vnd sehtzigostem jare.

Source Fulltext: Chartularium Sangallense VIII, Nr. 4907, S. 104-105.