Allen den, die disen brief an sehent lesent oder ho^erent lesen, kúnde ich Albreht || von Lindenberg¹ schulthaisse ze Wil² vnd vergih dez offenlich mit disem brief, || daz fúr mich kam^a) ze Wil in der stat, da ich offenlich ze geriht sass, die || erbern wolbeschaidenen Walther von Englaberg³ vnd Adelhait sin elichú husfrôw, vnd gaben da ledeklich vf ainen garten gelegen an dem Wilberg⁴, den man nempt dez Kellers gart von Môggwille⁵ vnd stosset ainhalb an der Trůnger garten, fúr reht aigen an sant Gallen vnd sant Othmars altar ze Wil in sant Niclaus kilchen⁶, vnd enzigen sich da vor offem geriht vnd hant sich och enzigen, als reht waz vnd mit gemainer vrtail ertailt wart, dez vorgeschriben garten aller aigenschaft reht rehtûng vordrûng vnd ansprach, so sú an dem zů dem vnd von des selben garten wegen ie hatten gewûnnen ald hie nach iemer gewinnen mo^ehten. Vnd ist dis alles redlich vnd reht beschehen vnd vollefu^ert mit allen den Worten werken ra^eten vnd geta^eten, so von reht vnd von gewonhait dar zů notdúrftig waren vnd als reht sitte vnd gewonlich was. Vnd des ze ainer ganzen warhait so han ich obgenander rihter min insigel gehenket an disen brief. Wir die vorbenempten Walther von Englaberg^b) veriehen och ain gantz warhait alles dez, so der obgenand rihter von vns an disem brief veriehen hett, vnd ze merer sicherhait der selben ding so han ich Walther von Englaberg min insigel och gehenket an disen brief, vnd wôn ich dú vorbenempt Adelhait aigens insigels nit han, so han ich mich willeklich verbunden vnd bind och mich vnder des vorbenempten Walthers mines elichen mannes insigel ze ainer vestenung aller vorgeschribener ding. Dis geschach vnd wart dirre brief geben ze Wil in der stat an sant Andres tag, do man zalt von gottes gebúrt drúzehen hundert iar, sehzig iar, dar nach in dem dritten jar.

Source Fulltext: Chartularium Sangallense VIII, Nr. 4908, S. 105-106.