Wir Geori von gottes gnaden abt des gotzhus ze sant Gallen¹ sant Benedicten ordens gelegen in || Costentzer bistům tůnt kunt mit disem brief allen den, die in ansehent alder ho^erent lesen, das fúr v´ns || kam der erber frome ritter herr Hainrich von Blůmenegge² vnd batte v´ns von des zehenden wegen || ze Limpach³ vnd von des zehenden wegen ze Bachtal⁴, die baide sin lehen sint von v´nserm gotzhus ze sant Gallen, das wir im gundint die selben zwen zehenden mit aller zůgeho^erde ze versetzenne ze rehtem phande a^vne abnútz vron Sophien Růdolfs sines sunes elicher husfrowen des edeln herren herr Lútoltes seligen von Krenkingen tohter⁵ fúr fúnftzig mark vnd núndehalb mark gůtes silbers Schafhuser⁶ gewihtes an ir hainstúr, die si dem selben Růdolfen irem elichen wirt zů braht het. Diser bette haben wir in geweret, als wir offenlich veriehen mit disem brief. Vnd do versazte der egenant herr Hainrich von Blůmenegge mit v´nser hant gůtem willen vnd gunst fúr sich vnd sin erben die obgenanten zwen zehenden mit allen nútzen vnd rehten, so darzů ho^erent, der vorgenanten vron Sophien Růdolfs sines sunes elicher husfrowen ze rehtem phande a^vne abnútz fúr die vorgeschribenn fúnftzig mark vnd núndehalb mark silbers an ir hainstúr, also das dú selbe vro Sophie ald ir erben oder nahkomen, ob si nit wa^ere, die êgenanten zwen zehenden mit aller zůgeho^erde haben vnd niessen vnd besetzen vnd entsetzen sont a^vne abnútz vnd a^vne minrung des silbers alle die wil, vntz das die selben zwen zehenden von inen erlo^eset werdent mit dem vorgeschribenn silber. Dis ist alles beschehen vnd vollefu^eret offenlich mit v´nser hant gůtem willen vnd gunst mit aller ordenung offenung behúgde worten vnd werken, so darzů hortent ald geho^eren soltent oder mohtent nah gewonhait vnd nach reht. Vnd des ze warem vrkúnde vnd gůter sicherhait haben wir v´nser insigel fúr v´ns vnd v´nser nahkomen gehenket an disen brief. Ich der vorgenant Hainrich von Blůmeneg ritter vergihe o^vch offenlich, das ich fúr mich vnd min erben gegen der vorgenanten vron Sophien Růdolfs mines sunes elicher wirtinnen alles das getan han, das von mir hie vorgeschriben ist. Vnd des ze warem vrkúnde han ich min insigel o^vch gehenket an disen brief. Der geben wart ze Wile⁷, do man zalt von gottes gebúrte drúzehenhundert vnd sehtzig jar vnd darnah in dem vierden ja^vre, an dem nehsten donstag nah sant Verenen tag.

Source Fulltext: Chartularium Sangallense VIII, Nr. 4956, S. 151.