Wir grauff Albreht von Werdenberg der alt¹ kúnden vnd vergehin offenlich mit vrkúnd diss brieffs vor allen den, || die disen brieff ansesend^a) oder ho^erent lesen, daz fúr v´ns kam gen Rinegg² vff die burg der fro^vme vest ritter herr Hug von || der Praiten Landenberg³, vnd kam o^vch do ze mal mit im sin bru^eder Herman von Landenberg⁴ der elter. Vnd do bat v´ns der e||benempt herr Hug von Landenberg vnd offenot vor v´ns, er hett etlichú gu^eter geerbt von siner elichen frowen frow Vrsellen von Clingenberg⁵, dú lehen von v´ns werint vnd im in pfantz wise vier hundert mark silbers stu^endint, vnd die selben pfantschaft welt er sich ga^entzlich entzihen fúr sich vnd sin erben in v´nser hant vnd weit es gern ze lehen von v´ns ha^vn, dar vmb daz wir die selben nah benempten guter sinem vor geschriben brůder Herman vnd sinen kinden, die er hat bi frowen Susannen von Clingenberg⁶ oder die si no^vch hinnen hin bi ain ander gewinnent^b). Vnd sint diz dú gu^eter, die vogtey ze Ro^vgwile⁷ gelegen bi Arbun⁸ vnd die vogtey ze Heuenhouen⁹ vnd ze Owenhouen¹⁰ vnd die frigen vnd waz die frigen hant, lút vnd gůt mit zwing mit ba^enne mit aller gewaltsami mit gerihten mit aller zů geho^erd. Vnd nah diser offenung bat vns der ebenempt herr Hug, daz wir die vor benempten lút vnd gůt und den pfantschaft von im vff na^emint an v´nser hant vnd denne die selben gůt gemainclich vnd ze rehter gemaind lihend dem selben herr Hugen von Landenberg vnd Herman sinem brůder vnd den kinden, die der selb Herman haut oder no^vch hinnen hin gewinot bi frowen Susannen von Clingenberg. Vnd do erhorten wir sin ernstlich bet vnd nament die egeschriben gůt vnd den pfantschilling vff an v´nser hant vnd lihent dem selben herr Hugen vnd sinem brůder Herman von Landenberg vnd Hermans kinden, die er haut oder no^vch gewimet^c) bi der egeschribnen frowen frow Susannen, die ebenempten gůt, die reht lehen von v´ns sint, gemainlich vnd nach gemaind reht ze rehtem lehen. Vnd habint das geta^vn vnd vollefu^ert mit worten vnd werchen, die dar zů hortent vnd notdúrftig warent, mit aller gehúgt vnd wie es craft vnd maht haben sol vnd haben mag gesundes libes vnd můtes. Des vnd aller vor geschribnen ding vnd gedingd ze vrkúnd henken wir egeschribner grauff Albreht von Werdenberg der alt v´nser aigen insigel an disen brieff. Ich herr Hug von Landenberg von der Praitenlandenberg kúnd vnd vergih offenlich mit vrkúnd dis brieffs vor allen den, die disen brieff an sehend oder ho^erent lesen, daz alles, daz min egeschribner herr grauff Albreht von Werdenberg hie von mir veriehen haut an disem brieff, war ist vnd alles von miner bett wegen beschehen ist. Vnd dez ze vrkúnde so henk ich dik benempter herr Hugg von der Praitenlandenberg min aigen insigel fúr mich vnd min erben an disen brieff. Dis beschach vnd wart dirr brieff geben ze Rinegg an dem nehsten dunstag vor v´nser frowen tag ze herbst, do man von Cristus gebúrt zalt drúzehenhundert jar, sehtzig jar vnd da nach in dem vierden jar.

Source Fulltext: Chartularium Sangallense VIII, Nr. 4957, S. 152-153.