Ich Johans Go^etzli statt amman ze V´berlingen¹ kúnd vnd vergih offenlich an disem brief allen, die in ansehent alder || ho^errent lesen, das an disem húttigen tag, als dirre brief geben ist, ze V´berlingen in der stat an offner des || riches strasse fúr mich kament fúr geriht Hainrich der Erbe burger ze V´berlingen vnd Elisabeth sin elichú wir||tinne Růdolfs sa^eligen des Kesslers tohter von Zukkenriet² vnd V^eli vnd Cu^eni ir baider elichen sún, vnd verzigent sich da a^ellú vierú willeklich vnd vnbetwungenlich alles des rehtes aller vorderung vnd ansprach, so si daher gehebt hettint alder nu hinnanhin iemer me kains weges haben alder gewúnnen mo^ehtint zů^a) allem dem erbe vnd dem gůt, so der vorgenant Růdolff sa^elig der Kessler der egenanten Elisabethen vatter nach sinem tod gelassen hetti, vnd das es den erwirdigen gaischlichen klosterfrowen der a^ebtissennen vnd dem conuent gemainlich des gotzhuses ze Maggenow³ nu hinnanhin ru^eweklich beliben sol, vnd das sú noch enkain ir erben noch nieman von ir wegen sú hinnanhin dar an weder sumen noch ierren sont weder mit geriht gaischlichem noch weltlichem noch ane geriht noch mit kainer slaht ander sach, vnd tatent och das verzihen, als vor ist beschaiden, gen Hainrich dem Suter von Maggenow [vn]d^b) in sin hant an der vorgenant klosterfrowen von Maggenow stat vnd in ir namen, won er och von ir [we]gen^b) vnd an ir stat dar komen was vnd och ir schafner vnd ir gewisser bott ist. Der vorgenant Hainrich der Erb, Elisabeth sin elichú wirtinne vnd V^eli ir elicher sun hant och vertro^estet fúr den obgenanten knaben Cu^enni Erben des ietzbenempten V^elis brůder, wenne er ze sinen tagen kumpt, das er denne dis vergiht vnd dis verzihen och vngeuarlich sta^et haben sol vnd das er die obgenanten klosterfrowen von des obgenanten gůtes wegen niemmer bekúmberren noch angesprechen sol mit kainer slaht sach. Si veriahent och a^ellú vierú da offenlich vor geriht, das si vmb dis verzihen vnd vfgeben vnd fúr die ansprach, so si zů dem vorgenanten êrb vnd gůt daher gehebt hettint, enphangen hettint von den obgenanten klosterfrowen von Maggenow sehs phunt Costentzer phenning vnd wa^erint och der ga^entzlich gewert. Vnd ze warem vnd offenne vrkúnd aller diser vorgescribenen ding hab ich vorbenempter Johans Go^etzli stat amman ze V´berlingen durh ir aller bett willen der vorbenempten min insigel gehenket an disen brief. Der geben ist ze V´berlingen, do man von Cristes gebúrt zalt drúzehenhundert jar vnd darnach in dem vier vnd sehtzigosten jar, an dem na^ehsten sunnentag nach sant Gallen tag, da ze gegen warent her Berhtolt von Hasenstain⁴ ritter, Hainrich Rienolt, Hans der Lo^ew vnd V^olrich der Ehinger vnd ander erber lút gnůg, die es sahent vnd hortent.

Source Fulltext: Chartularium Sangallense VIII, Nr. 4962, S. 155-156.