Wir Geori von gottes gnâden abt¹ vnd der conuent gemainlich des gotzhus ze sant Gallen sant Benedicten ordens veriehen vnd || tu^en kunt mit disem brief allen, die in ansehent lesent oder ho^erent lesen, daz v´nser lieber getrúwer Albreht von Lindenberg² || schulthais ze Wil³ dis nahgeschriben ho^ef den hof ze Raitenberg⁴ vnd den hof ze Hertenberg⁵, die sin reht aigen gewesen sint, v´ns || letklich vfgeben hat an v´nser hand vnd die selben zwen ho^ef ze lehen von v´ns enpfangen hat, vnd darumb so haben wir daz gůt ze Hútstal⁶, daz lehen von v´ns vnd v´nserm gotzhus was, geaigent den erwirdigen gaistlichen frowen der a^ebtischinen vnd dem conuent gemainlich des gotzhus ze Ta^ennikon⁷ vnd enzihen v´ns och vnd haben v´ns enzigen mit disem brief fúr v´ns vnd fúr alle v´nser nâhkomen gen den vorgenemten frowen ze Ta^ennikon vnd gen irem gotzhus aller aigenschaft aller lehenschaft aller manschaft aller kuntschaft aller reht vnd rehtung aller vordrung vnd ansprach, so wir zů dem vorgeschriben gůt ze Hútstal ie gehept hant oder hernach iemer gehân gewinnen oder erwerben mo^ehten von reht oder von gewonhait oder von dehainen andren sachen. Vnd ist dis alles reht vnd redlich beschehen vnd volfu^ert mit allen den worten vnd werken, so nâh gewonhait vnd nâh reht darzů gehorten vnd notdurftig waren vnd als reht sitte vnd gewonlich was. Vnd ze offenem waren vrkúnd vnd sta^eten sicherhait aller diser vorgeschriben ding haben wir abt Geori vnd der conuent gemainlich des vorgeschriben gotzhus v´nsri insigel gehenket an disen brief. Der geben ist ze sant Gallen an sant Gregorien tag in dem iar, do man zalt von gottes gebúrt drúzehenhundert iar, sehzig iar vnd darnach in dem fúnften jare.

Source Fulltext: Chartularium Sangallense VIII, Nr. 4976, S. 169-170.