Allen^b) den, die disen brief an sehent lesent oder ho^erent lesen, tůn ich^c) Johans Tennler kunt vnd vergih offenlich an disem brief, das fúr mich kam ze Swarzenbach¹ in dem dorf, da ich offenlich ze geriht sass an mines gena^edigen herren stat herr Johans von Vrowenuelt² ritters, ainhalb || der frome kneht Hainrich Bûman, den man nemt der Sûter von Maggnôw³, vnd andrenthalb Johans Bûman sin brůder vnd sin elichú husfrôw, Růdolf ir baider sûn vnd Angnes der selben Buman swo^ester vnd Cůnrat des Ammans elichú husfrôw, vnd offenoton da die vorgenem||ten Johans Bûman, sin elichú husfrôw, Růdolf ir sûn vnd die vorgenemt Angnes mit Johans dem Kupfersmit, den man nemt Wirri, irem fúrsprechen vnd sprachen, daz sú ainhelleklich v´ber ain komen wa^erin mit dem vorgenemten Hainrich Bûman, daz er inen allen vieren geben || hetti daz gůt gelegen ze Swarzenbach, daz man nemt Magelspergs gůt⁴, mit allen rehten nútzzen vnd mit aller zů geho^erd, v´ber daz selb gůt min vorgenemter herre vogt vnd herre ist, im in dirre sach an sinen rehten vnd gewonhaitten vnscha^edelich, ze rehtem lipding vnd in rehtes lipdinges wise fúr alle die gemaind tail erb vnd erbschaft vnd alle die reht rehtung, so sú von kainer gemaind wegen zůz im ie gehebt hand ald noch iemer gewinnen mo^ehten vor sinem tod vnd nach sinem tôd, also daz sú das selb gůt mit aller zů geho^erd haben vnd niessen sont, alle die wile sú lebond sint, mit solicher beschaidenhait vnd mit der gedingde, daz sú alle ia^erklich dem vorgenemten Hainrich Bûman vss dem selben gůt vor vs geben vnd rihten sont ain malter habern vnd ainen mút kernen gena^emes Wil⁵ messes vnd daz sú der vorgenemten Angnesûn ir swo^ester ze ende ir wile och vss dem selben gůt ia^erklich geben vnd rihten sont ainen mút kernen och Wil mess vnd vier schilling pfenning Costenzer múns vnd nit me, vnd sol fúrbas die selb Angnes mit dem vorgenemten gůt nit ze schaffenn haben, vnd sont dann Hans Bûman, sin elichú husfrôw vnd Růdolf ir sun daz vorgenemt gůt ze ende ir wile v´ber daz vorgeschriben gelt haben vnd niessen. Es sol och daz vorgenemt gůt, weles vnder Hainrich Bûman, Johans sinem brůder, siner elichen husfrowen vnd Růdolf ir sûn ab stirbet, von ainem an daz ander vallen ane var, stirbet och d[ie]^d) vorgenemt Angnes ab vor den vorgenemten iren brůdern, so sol der vorgeschriben mút kerne vallen an Hainrich Bûman vnd die vier schilling pfenning geltz an Johans Bûman, sin elichen husfrôwen vnd Růdolf ir sûn, vnd wenn sú a^ellú ab sterbent vnd ensint, so sol [da]z^d) vorgeschriben gůt vnd daz lipding mit allem reht vnd mit aller zů geho^erd ledklich vallen an die erwirdigen frowen des conuentz ze Maggenôw⁶ vnd an ir gotzhus an wider rede. Es offnot och der selb Johans Kupfersmit fúrbas von ir aller we[gen]^d), daz Johans Bûman, sin elichú husfrôw vnd Růdolf ir baider sûn v´berain komen wa^erin mit dem selben Hainrich Bûman, daz sú an alle geuerd alles ir varend gůt, wie daz gehaissen ist vnd genemt, von Kurwalhen⁷ her ab zúhen sont vff den na^ehsten sant Mic[hel]s^d) tag, der ietz na^ehst kunt nach dem als dirre brief geben ist, vnd och alles ir ligent gůt verkoffen sont vnd es och daz varend vnd daz ligent och zúhen vnd an legen sont hinder die vorgenemten frôwen ze Maggnôw vnd ir gotzhus vff den na^ehst[e]n^d) v´nser vrowen tag ze der liehtmiss dem na^ehsten, der nû kunt nach dem als dirre brief geben ist. Ta^etin sú des nit, daz sú daz varend gůt nit her ab zûgen vff den vorgeschriben sant Michels tag vnd daz ligent gůt vff v´nser vrowen tag hinder die vorgenemten frowen vnd ir gotzhus, als vor ist geschriben, so sol dem vorgenemten Hainrich Buman daz vorgenemt gůt vnd daz lipding mit allem reht ledklich ledig sin vnd wider geuallen, an alle wider rede, vnd sont sú enkain reht noch enkain ansprach dar zů niemer me haben noch gewinnen weder mit reht noch an reht noch mit enkainen andren sachen. Vnd vmb daz vorgeschriben gůt vnd och daz lipding wolten sú die vorgenemten Johans Bûman, sin elichú husfrôw vnd Růdolf ir sûn vnd Angnes ir baider swo^ester sich a^ellú gemainlich ledklich verzihen nach reht aller der gemaind tailes erbes vnd erbschaft aller reht rehtung vordrung vnd ansprach, so sú zů dem vorgenemten Hainrich Bûman von alles sines gůtez wegen ie hatten ald noch hinnenhin iemer gewinnen mo^ehten vor sinem tode vnd nah sinem tod. Vnd baten mich vorgenemten rihter ze eruarn, wie sú daz tůn solten, daz es kraft hetti nû vnd hernach. Do fragt ich vmb vnd wart mit gesamnoter vrtail ertailt, daz die vorgenemt Angnes solte stan mit irem vôgt, vnd wenn si beuogtot wûrde, daz si dann ir vogt dristunt solte fu^eren ab des gerihtes ring vnd sie ze ieglichem mal fragen solte, ob si daz wilklich gern vnd vnbetwungenlich ta^et vnd och tůn wolte, vnd wo der saiti ze dem dritten mal bi sinem aid, daz sie daz wilklich gern vnd vnbetwungenlich ta^et vnd och tůn wolte vnd sú och daz a^ellú ta^etin mit des gerihtes stab, daz es also wol kraft hett nû vnd hernach. Do nam die vorgenemt Angnes ze vôgt Růdolf den Aster, mit dem sie mit reht vnd mit vrtail beuôgtot wart vmb dise sach, der fůrte sie ze drîn malen ab des gerihtes ring vnd fragte sie ze ieglichem mal, ob sie daz wilklich gern vnd vnbetwungenlich ta^et vnd och tůn wolte, der sait bi sinem aid ze dem dritten mal, daz si daz wilklich gern vnd vnbetwungenlich ta^et vnd och tůn wolte. Vnd nach dem giengen die vorgenemten Johans Buman, sin elichú husfrôw, Růdolf ir sûn vnd Angnes ir baider swo^ester mit Růdolf dem Aster irem erkornen vogt dar vor offem geriht vnd griffen do ze stett a^ellú gemainlich an den stab vnd gaben ledklich vf vnd verzigen sich fúr sich vnd alle ir erben mit dem stab mit gelerten worten alles tailes vnd gemaind aller reht rehtung vordrung vnd ansprach, so sú von kaines gůtz wegen, es sie ligent oder varent gůt, wa vnd wie daz gehaissen vnd gelegen ist, zů dem vorgenemten Hainrich Bûman ie hatten ald noch hinnenhin iemer gewinnen mo^ehten in kain wis, als reht waz vnd als mit gesamnoter vrtail wart ertailt, vnd daz sú a^ellú noch iro aines noch enkains noch ir erben noch nieman andre von iro wegen noch an ir stat den selben Hainrich Bûman noch den, wem er sin gůt verschaffot hat, wer der ist, es sie frôw oder man, vmb ain kainen tail noch vmb ain kain gemaind weder vor tôd noch nach tod von kains sines gůtes wegen niemer me sont ansprechen vf triben bekúmberron noch bekrenken noch in kain wis beswa^erren weder mit gaistlichem noch mit weltlichem geriht noch an reht noch mit enkainen andren sachen sust noch so. Vnd ze ainer warhait vnd offem vrkúnd aller diser vorgeschriben sach ding vnd bedingde, won i[c]h^d) Johans Ta^ennler da vorgenemt aigens insigels nit enhan, so han ich dise sach braht fúr minen vorgenemten herren. Ich Johans von Vrowenuelt ritter da vorgenemt vergih offenlich an disem brief, daz dise sach, die dirre brief wist vnd sait, min gůter wille vnd gunst ist, vnd won Johans Ta^ennler min getrúwer amtman aigens insigels nit enhat, so han ich von des gerihtes wegen min insigel gehenket an disen brief. Dar nach veriehen wir Růdolf Aster der vorgenemten frowen vôgt in dirre sach vnd ich Johans Kupfersmit fúrsprech och ain gantz warhait aller diser vorgeschribener ding, vnd ze merer sicherhait der selben ding henken wir och v´nsri insigel an disen brief. Der geben ist ze Swarzenbach in dem dorf in dem iar, do man zalt von [go]ttes^d) gebúrt drúzehenhundert iar sehzig iar, dar nach in dem fúnften iar, an dem na^ehsten dunstag vor sant Mathies tag.

Source Fulltext: Chartularium Sangallense VIII, Nr. 4975, S. 167-169.