Ich^a) Haintz der Zúnd von Altstetten¹ burger ze Pludentz² kúnd vnd vergich an disem offenn brief allen den, die in ansenhent || oder ho^erent lesen, daz ich mit vorbedahtem můt nach erber lút raut reht vnd redlich aigenlich ze ko^vffen geben ha^vn vnd || min erben, ob ich enwa^er, dem gůten herren sant Laurentzzen, der gnedig ist der kilchen ze Pludentz³, min aigen hus vnd ho^vffstat vnd || ho^vffraiti, dz gelegen ist ze Pludentz in der stat zw´schent Wa^eltins Sniders hus vnd der frowen von sant Peter⁴, waz nůt vnd nagel begriffen haut vnd swellen, si sigent vnder erd ob erd sihtig ald vnsihtig, vnd grund vnd graut vnd den garten, der dar an gelegen ist, der wilent der frowen von sant Peter aigen waz, vnd den garten, der gelgen ist ze Pludentz vor der stat, den ich da ko^vft von Haintzen dem Frúnt vnd ze beden sitten stosset an Hartmans von Prautz⁵ bo^vngarten vndenan vnd obenan vnd fornan zů an die stra^vss, vnd allú die reht, die zů dem vorgenanten hus vnd ho^vfstat vnd ho^vfraiti vnd den vorgenanten garten ho^erent vnd geho^eren mugent, daz ha^vn ich alles im geben vmb aht pfunt pfenning gůter vnd gnemer Costentzer múns, der ich gar vnd gentzlich von im gewerot bin vnd in minen redlichen nutz komen sint. Ich vnd min erben so^ellint och dez vorgenanten gůten herren sant Laurentzen ald wer denn sin kilchen mayger sint vmb dis vorgenant hus vnd ho^vffraiti vnd ho^vffstat vnd och die vorgenanten garten ir gůt wer sin, wa sú sin iemer bedúrffent oder notdúrfftig werdent an gaistlichem ald an weltlichem geriht nach dem rechten mit gůten trúwen a^vn alle geua^erd. Vnd dez ze waren offner vrkúnd vnd gantzer sta^etter sicherhait won ich aigens insigels nit enha^vn, so pit ich den erbern wolbeschaiden man Johansen hern Růdolfs seligen sun ritters vogt ze Pludentz, daz er fúr mich sin aigen insigel henk an disen brief, dar zů ze mer sicherhait so pit ich och die erbern fromen wisen lút die burger gemainlich der stat ze Pludentz edel vnd vnedel, daz si ir stat insigel henkint an disen brief. Ich Hans hern Růdolfs seligen sun vogt ze Pludentz henk durch bet willen, so der vorgenant Haintz der Zúnd an mich geta^vn haut, min aigen insigel an disen brief mir vnd minen erben a^vn schaden. Dar zů vergenhent wir die burger gemainlich ze Pludentz edel vnd vnedel, daz wir och durch bet willen, so der vorgenant Haintz der Zúnd an v´ns geta^vn haut, v´nser aigen stat insigel henkint an disen brief v´ns vnd der stat vnscha^edlich. Dirr brief wart geben ze Pludentz in der stat dez jares, do man zalt von gotes gebúrt drúzehen hundert jar vnd dar nach in dem fúnf vnd sehzigosten jar ze vsgendem o^vgst manot.

Source Fulltext: Chartularium Sangallense VIII, Nr. 4995, S. 182.