Ich^a) Johans Schriber uss der Owe¹ tun kund allen, die disen brief sehent oder ho^erent lesen, vnd vergich offenlich, das^b) ich den erbern wolbescheidenn || dem Hessen spitalmeister, Berchtold Honburger vnd Johansen Hegdorn pfla^egern des spitals ze dem heiligen geist ze Rapreswille² ze || des selben spitals wegen disi nachgeschriben gu^eter, des ersten das gu^etli, das man nemmet Widmenwis von Nůlan³, das holtz in || der Owe, Pfungen¹ holtz, Fryen Rúti⁴ vnd Nu^elerberg⁵ vnd das gu^etli, das gelegen ist am Wîderberg⁶ vnd vff den drin veldern ze Wangen⁷ mit allen rechten, so dar zů vnd dar in geho^ert, es si mit akkern mit zehenden mit kilchensatz mit holtz mit veld mit wisen mit matten mit wunne mit weide mit wasser wasser rúnsen vnd sunderlich mit allen zů geho^erden fryeheit vnd ehafti, die zů den obgenanten gu^etern geho^erent vnd da her geho^ert habent in dehein wise, recht vnd redlich mit gůter vorbetrachtung ze ko^vffenn geben han vmb hundert vnd viertzig pfunt pfenning gůter vnd genger Zúricher múntz, der o^vch ich gar vnd gentzlich von inen gewert bin vnd in minen nûtz komen sint. Vnd da vmb so setze ich den obgenanten meister vnd pflegere ze des obgenanten spitals vnd der dúrftigen wegen mit vrkúnde dis briefes in nûtzlich gewer aller der vorgeschriben gu^etern mit allen rechten, so dar zů geho^ert, ân geuerde, vnd entzieh mich gentzlich fúr mich vnd min erben, ob ich enwere, die ich vestklich har zů binde, aller rechtung vordrung vnd ansprach, so ich oder min erben, ob ich enwere, nach den obgenanten gu^eter mit allen rechten, so dar zů oder dar in geho^ert, gen dem vorgenanten spitalmeister vnd pflêgern vnd gen ir nachkomen ze vorgenanten spitals wegen in dehein wise iemer gewinnen oder gehaben mo^echt mit geistlich oder weltlichen gerichten oder ân gericht oder mit deheinen andern sachen, an alle geuerde. Ich der vorgenant Johans Schriber loben o^vch mit gůten trúwen fúr mich vnd min erben, die ich vestklich har zů binde, der vorgeschriben gu^etern mit allen rechten, so dar zů vnd dar in geho^ert, den obgenanten spitalmeister vnd pflegern vnd iren nachkomen ze des egenanten spitals wêgen recht wêrn ze sin nach recht vmb den vorgeschriben ko^vff vor geistlichen vnd weltlichen gerichten vnd mit namen an allen stetten, wo vnd wenn si sin notdúrftig sint, ân alle geverde. Ich der vorgenant Johans Schriber hab o^vch ze merer sicherheit minen gena^edigen herren byschoff Heinrich von Costentz⁸, in des bystům die vorgenanten gu^eter gelegen sint, gebetten vnd bit in o^vch mit disem brief, das er disen redlichen ko^vff luterlich durch got in des heiligen geistes here^c) vnd das vorgen(ante) dúrftigen des egenanten spitals vnd alle iro nachkomen ir narung vnd o^vch ein capplan, der inen sing vnd lese, dester fúrderlich haben múgent, besta^ete vnd sinen willen vnd gunst dar zů gebe vnd o^vch sin insigel zů minem insigel ze vester sicherheit aller vorg(enanten) ding henk an disen brief. Wir Heinr. von gottes genaden byschoff ze Costentz veriehen offenlich an disem brief, das wir durch bette des vorgenanten Johans Schribers vnd o^vch des spitalmeisters vnd der pflegern, dar vmb das dúrftigen des selben spitals ir notdurft, als vorg(eschriben) stat, dester fúrderlichen haben múgen, vnsern willen vnd gunst dar zů geben vnd besta^eten o^vch den selben ko^vff mit vnserm bischoflichen gewalt dem vorgenanten spital vnd den dúrftigen gemeinlich des selben spitals an iro tisch vnd allen iro nachkomen. Vnd des ze einem waren vesten vnd staten vrkúnde so habent wir vnser insigel zů des vorgenanten Johans Schribers insigel gehenkt offenlich an disen brief. Ich der vorgenant Johans Schriber hab o^vch ze warem vnd offem vrkúnde vnd sta^eter sicherheit aller vorg(eschriben) ding min insigel zů mines des vorgenanten gena^edigen herren byschoff Heinr. von Costentz insigel offenlich gehenkt an disen brief. Der geben ist Zúrich in dem jare, do man zalt von gottes gebúrt drúcehenhundert vnd sechtzig jar vnd dar nach in dem funften jare, an der na^echsten mitwuchen vor sant Vrbans tag.

Source Fulltext: Chartularium Sangallense VIII, Nr. 4984, S. 175-176.