Allen^a) den, die disen brief ansehent lesent oder ho^erent lesen, kúnd ich Johans von Stainach statamman ze sant Gallen¹ vnd vergich offenlich mit disem brieue, daz fúr mich kament ze sant Gallen || an der na^ehsten mitwuchen nach sant Nycolaus tag, do ich an dez rîches strâss offenlich ze geriht saz, die êrsamen in gotte vro Katherina von Eppenberg a^ebtissenn vnd swester Adel||hait die Birno^vwerin kellerin dez gotzhus ze Maggeno^vw vnd veriahent da mit fúrsprechen offenlich vor mir vnd dem geriht fúr sich vnd fúr den conuent gemainlich dez selben gotzhus ze || Maggeno^vw vnd fúr alle iro nachkomen, daz sú von iro vnd von dez selben iro gotzhus grôsser gúlt vnd redlicher nôt wegen, mit den sú v´berladen wa^erint vnd darvmb sú an wahsendem schaden stu^endint, alle gemainlich vnd ainmu^eteklich mit iro frúnde vnd mit ander êrber lút rât vnd o^vch mit iro obern vnd iro abtes von gottes gnâden abt Albrehtz abt dez gotzhus ze Wettingen gůtem willen gunst vnd verhengde, alz der brief² wol bewîst, den sú darumb von dem selben abt Albreht offenlich vor mir vnd dem geriht zo^egtent vnd offenotent, reht vnd redlich verko^vft vnd ze ko^vffenn geben hettint den êrberen vnd wolbeschaidnen Bartholome Blârrer, Johansen Blârrer vnd Johansen Burgo^vwer phleger der siechen dez spittals ze sant Gallen³ an dez selben spittals stat vnd ze sinen handen den hofze Bru^ewille vnd den hofze Ba^echi, der ainhalb stôsset an den hof, den man nemmet Andrenbu^el⁴, die iro reht ledig aigen wa^erint, mit hûs mit hof mit akkern mit wisen mit wasen mit zwi mit holtz mit veld mit wunn mit waiden mit stok mit stain mit stegen mit wegen mit wasser mit wasserflússen vnd gengen mit aller êhafti mit allen rehten nútzzen vnd gewonhaiten vnd mit allem dem, so von reht ald von gewonhait zv^o den selben ho^efen ald darin geho^erent, ez sie genemtz oder vngenemtz gesůchtz oder vngesůchtz wissentz oder vnwissentz, vmb anderhalb hundert phunt phenning gůter vnd gena^emer Costentzzer múnse, der sú gantzlich vnd gar von in gewert wârint vnd enphangen hettint vnd an iren vnd iro gotzhûs offenn nutz bewendet an den stetten, da sú iren vnd dez selben iro gotzhus grôssen vnd wahsenden schaden mit verkomen hettint, vnd wo^eltint o^vch die selben ho^ef mit aller zv^o geho^erde den vorgenemten phlegern vertgen vnd zv^o iren vnd dez vorgedahten spittals handen bringen, vnd bâtent mich mit irem fúrsprechen eruarn an ainer vrtail, wie sú daz tůn so^eltint vnd mo^ehtint, alz reht wa^er vnd daz ez kraft hett vnd haben mo^eht nv^ vnd o^vch hie nâch. Do fragot ich vorbenemter amman vrtail vmb, vnd ward ertailt mit gemainer vrtail, daz sú die selben ho^ef mit aller zů geho^erde an offener dez riches strâsse in der obgenanten phleger vnd zv^o dez vorgedâhten spittals handen v^f geben vnd vertgen so^eltint vnd daz sú o^vch dann sweren so^eltint ietwedri besunder ainen gelêrten ait ze den hailigen mit v^fgehabnen vingern fúr sich fúr den conuent gemainlich vnd fúr alle ir nâchkomen, die vorgeschribenen ho^ef niemer an ze sprechenn mit geriht noch ân geriht, vnd daz ez dann also wol kraft vnd maht hetti nâch dem rehten. Vnd gabent o^vch do die vorgenemten vro Katherina von Eppenberg abtissenn vnd swester Adelhait die Birno^vwerin kellerin an iro vnd an dez conuentes stat gemainlich dez vorgeschribenen gotzhus ze Maggeno^vw offenlich an dez rîches strâsse die vorgenemten ho^ef den hof ze Bru^ewille vnd den hof ze Ba^echi mit allen rehten vnd mit aller zv^o geho^erde, alz vorgeschriben stât, willeklich vnd frilich reht vnd redlich fúr ain reht ledig aigen v^f in der obgenanten phleger vnd zv^o dez vorgedâhten spittals handen, alz reht sitte vnd gewonlich waz vnd alz o^vch mit gemainer vrtail ertailt ward, vnd verzigent sich o^vch do die vorgenanten vro^vwen fúr sich fúr den conuent gemainlich vnd fúr alle iro nâchkomen willeklich vnd frilich gantzlich vnd gar vnd verzihent sich mit disem brieue der vorgenemten ho^ef baider mit aller zv^o geho^erde aller aigenschaft aller manschaft aller kuntschaft aller gewêr lút vnd brief aller gnâden vnd aller frihait, die sú ietz hattent ald die sú ald iro nâchkomen hienâch iemer erwerben mo^ehtint von ba^ebsten vnd die vnder den sint, von kaysern von kúngen vnd die vnder den sint, aller helf vnd alles schirmes gaistlichs vnd weltlichs gerihtes aller gewonhait der stette vnd dez landes alles v^szuges vnd aller fúnde, die ietz funden sint ald hienâch iemer funden werdent, da mit sú ald dehain iro nâchkomen ald ieman von iro wegen den vorgeschribenen redlichen ko^vff mo^ehtint bekrenken gebrechen ald wider tůn gantzlich ald in dehainen tail mit gaistlichem ald mit weltlichem geriht ald ân geriht. Vnd swůrent o^vch do die vorgenemten vro Katherina von Eppenberg a^ebtissenn vnd swester Adelhait die Birno^vwerin kellerin ietwedri besunder willeklich amen gelerten ait ze den hailigen mit v^f gehabnen vingern, daz sú noch dehain ir nâchkomen noch nieman andre von iro wegen noch an iro stat die vorgenemten phleger noch dehain ir nâchkomen noch den vorgedahten spittal ze sant Gallen von der vorgedâhten ho^ef wegen niemer mê súllent noch wellent an sprechen v^f triben bekúmberren bekrenken noch in kain wîs beswa^eren weder mit reht noch ân reht noch mit enkainerlay ander sache, ân alle geua^erde. Die vorgenemten vro Katherina von Eppenberg a^ebtissenn vnd swester Adelhait die Birno^vwerin kellerin lobtent o^vch mit iren trúwen vnd lobent mit disem brieue fúr sich fúr den conuent gemainlich dez vorgeschribenen gotzhûs ze Maggeno^vw vnd fúr alle ir nâchkomen, der vorgeschribenen ho^ef baider vnd o^vch dez ko^vffes fúr ain reht ledig aigen wern ze sinne nâch reht vnd o^vch die vorgenemten phleger vnd iro nachkomen vnd den vorgeschribenen spittal ze sant Gallen darumb ze versprechenn vnd ze versta^enne an allen stetten gen aller ma^englichem ân allen iren schaden vff gaistlichem vnd vff weltlichem geriht, wenn wa vnd wie dik sú darumb an gesprochen geschadgot oder v^f getriben werdent. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nâch gewonhait vnd nâch reht darzů gehortent ald ho^eren soltent vnd nôtdurftig wârent vnd alz ez kraft vnd maht solt vnd moht han. Vnd ze ainem wâren vrkúnde vnd gantzzer sicherhait aller der vorgeschribenen dinge vnd gedinge so han ich Johans von Stainach statamman da vorgenemt von dez gerihtes wegen min insigel gehenkt an disen brief, won ez o^vch mit gemainer vrtail ertailt ward, daz ich ez tůn so^elt. Darnâch veriehent wir die vorgenemten vro Katherina von Eppenberg a^ebtissenn, swester Adelhait die Birno^vwerin kellerin vnd der conuent gemainlich dez vorgeschribenen gotzhûs ze Maggeno^vw offenlich mit disem brieue fúr vns vnd alle vnser nâchkomen, daz alles daz wâr ist, daz von vns an disem brief da vorgeschriben stât, vnd ze mêrer sicherhait der selben dinge so han ich obgenantú a^ebtissenn min insigel vnd der conuent gemainlich vnsers conuentes insigel fúr vns vnd alle vnser nâchkomen gehenkt an disen brief. Der geben ist ze sant Gallen an der vorgeschribenen na^ehsten mitwuchen nâch sant Nycolaus tag in dem jâr, do man zalt von gottes gebúrt drúzehenhundert jâr, sehszig jâr vnd darnâch in dem fúnften jâre.

Source Fulltext: Chartularium Sangallense VIII, Nr. 5006, S. 192-194.