Allen^a) den, die disen brief ansehent lesent oder ho^erent lesen, kúnden wir die nâchgenemten Walther Blârrer wîlunt statamman ze sant || Gallen¹ gemain man, Hainrich Blârrer vnd Hûg Schůlmaister burger ze sant Gallen schidlút in der nâchgeschribenen sache vnd ver||iehen offenlich mit disem brieue von der sto^esse misshellung vnd ansprâchen wegen, so die erbern vnd wolbeschaidenn Bartholome Blâr||rer vnd Hainrich Ko^echler phleger der veltsiechen an dem Linsibúhel bi der stat ze sant Gallen² hattent zv^o Johansen Ho^ern dem goltsmit von dez zehenden wegen ze dem Frigen dorf³, der selb zehend der vorgedahten veltsiechen ist, vnd o^vch von der versessener zins wegen, die er inen vnd o^vch gen Arbon⁴ in den hof von iro wegen von dem selben zehenden solt geben vnd geriht hân. Der selben sto^ess sú baidenthalb willeklich vff v´ns kament ze dem rehten. Der selben baider tail red vnd wider red wir in nament vnd verhortent von wort ze wort. Vnd nâch der obgenanten phleger klag vnd ansprâch vnd nâch dez vorbenemten Johansen Ho^ern antwûrt vnd wider red do erkandent wir v´ns nâch dem rehten vnd sprâchent vnd hiessent den vorgenemten Johansen Ho^ern, daz er die vorgedâhten veltsiechen noch die vorgenemten ir phleger noch dehain iro nâchkomen an dem vorgeschribenen zehenden ze dem Frigen dorf hinnenhin niht sûmen noch ierren so^elt weder mit geriht noch ân reht, vnd daz er o^vch darumb swêren so^elt ainen gelêrten ait ze den hailigen. Vnd vmb die versessenen zins hiessent wir die obgenanten phleger, daz sú den vorbenemten Johansen Ho^er vnd sin erben darumb ledig vnd los lâssen so^eltint an der vorgedahten veltsiechen stat vnd daz sú o^vch den versessenen kernen gen Arbon geben vnd rihten so^eltint. Vnd verzech sich o^vch do der obgenant Johans Ho^er offenlich vor v´ns willeklich vnd gern gantzlich vnd gar vnd verziht sich mit disem brieue fúr sich vnd alle sin erben aller der reht vordrung vnd ansprâchen gaistlichs vnd weltlichs gerihtes, so er vnd sin erben, ob er enwa^er, an dem zv^o dem vnd von dez vorgeschribenen zehenden wegen ze dem Frigen dorf ie gehattent ald hie nâch iemer gehaben oder gewinnen mo^ehtint. Vnd swůr o^vch do der obgenant Johans Ho^er offenlich vor vns willeklich ainen gelêrten ait ze den hailigen mit v^f gehabnen vingern, daz er noch sin erben, ob er enwa^er, noch nieman andre von iro wegen noch an iro stat die vorgedâhten veltsiechen noch die vorgenemten iro phleger noch dehain iro nâchkomen von dez vorgeschribenen zehenden wegen ze dem Frigen dorf niemer mê súllent noch wellent an sprechen v^f triben bekúmberren bekrenken noch in kain wis beswa^eren mit Worten noch mit werken an gaistlichem noch an weltlichem geriht noch ân reht noch mit enkainer lay ander sache ân alle geua^erde. Vnd ze ainem wâren vrkúnde vnd gantzzer sicherhait aller der vorgeschribenen dinge vnd vergiht so haben wir die vorgenemten Walthêr Blarrer gemain man, Hainrich Blârrer vnd Hûg Schůlmaister schidlút in der vorgeschribenen sache v´nserú insigel gehenkt an disen brief. Ich Johans Ho^er da vorgenemt vergich ainer gantzzer wârhait aller der dinge vnd gedinge, so von mir an disem brief da vorgeschriben stânt, vnd ze mêrer sicherhait der selben dinge so han ich o^vch min insigel fúr mich vnd alle min erben gehenkt an disen brief. Darnâch vergich ich Cůnrat Ho^er dez obgenanten Johansen Ho^ern vetter o^vch burger ze sant Gallen offenlich mit disem brieue, daz ich bi diser vorgeschribenen rihtung gewesen bin vnd mit minem gůten willen vnd gunst beschehen vnd vollefu^ert ist. Vnd ze mêrer sicherhait der selben dinge so han ich o^vch min insigel gehenkt an disen brief. Der geben ist ze sant Gallen an dem na^ehsten zinstag nâch sant V^olrichs tag in dem jâr, do man zalt von gottes gebúrt drúzehenhundert jâr, sehszig jâr vnd darnach in dem sehsten jâre.

Source Fulltext: Chartularium Sangallense VIII, Nr. 5033, S. 222-224.