Allen den, die disen brief ansehent lesent oder ho^erent lesen, kúnde ich Johans von Stainach¹ statamman ze sant Gallen vnd vergich des offenlich mit disem gegenwúrti||gen brief, das fúr mich kam ze sant Gallen in der stat, do ich offenlich ze gericht sass, der beschaiden man Johans Gêtzenwiller burger ze sant Gallen vnd offnot vnd || veriah da der selb Johans offenlich vor mir vnd dem gericht vnd sprach, das er von der erberen frowen Adelhaiden der Friginen burgerinen ze sant Gallen Johansen des || Frîen sa^eligen wilunt elicher Wirtinnen recht vnd redlich vnd mit gůter vorbetrahtung das hus vnd hofstat gelegen ze sant Gallen in der stat an der Núwen gassen² zwúschent Růdolff des Ru^edgers hus vnd Cristans hus von Watt³ mit allen rechten vnd zů geho^erden geko^vfft hett also mit der beschaidenhait vnd in dem rechten, das er vnd alle sin erben vnd nachkomen, in der hant vnd gewalt das selb hus vnd hofstat iemer kumt ald stât, von dem selben hus vnd hofstat aller ja^erlich ie ze sant Martins tag der vorgenemten Adelhaiden der Friginen ze rechtem ia^erlichen zinse fúnf schilling pfenning gůter Costentzer múnse ân alle minnrung vnd ân allen fúrzug geben vnd richten sont, vnd wenne die selb vorgenemt Adelhait abstirbet vnd von todes wegen enist, so sol der selb vorgenemt Johans Getzenwiller vnd alle sin erben vnd nachkomen danne von dem vorgeschribnen hus vnd hofstat eweklich vnd aller ja^erklich ie vffsant Martins tag fúnf schilling gůter pfenning der vorgeschribnen múnse ân alle minrung ze rehtem ja^erlichen zinse ainer priolinen in der sammnung gelegen vor der stat ze sant Gallen⁴, weli dann ie da priolin ist, geben weron vnd richten ân fúrzug vnd ân alle widerrede, vnd sol dann die selb priolin von den selben fúnf schilling pfenningen zů der vorgenemten Adelhaiden der Friinen jârzit aller ja^erlich geben vnd vnuerzogenlich richten ainem lútpriester ze sant Laurencis kilchen ze sant Gallen⁵ drie pfenning vnd sinem mitpriester drie pfenning, ainem priester ze vnser frowen kilchen⁶ drie pfenning, ainem priester ze sant Johann⁷ drie pfenning, ir selben vnd den frowan gemainlich in der selben sammnung zwen schilling pfenning vnd den siechen an dem Linsibu^el⁸ zwen schilling pfenning durch der selben vorgenemten Adelhaiden sêl vnd aller gelo^vbigan sêlan hail willen, vnd sont die vorgenemten priester das selb jârzit ja^erlich begân mit sêlmess vnd der vorgenemten Adelhaiden sêl vnd aller gelo^vbigan sêlan gedenken, als vntz her sitt vnd gewonlich gewesen ist, vnd die vorgedahten die priolin vnd die frowan in der sammnung vnd die siechen an dem Linsibu^el sont o^vch aller ja^erlich ze dem vorgeschribnen jârzit der selben vorgenemten Adelhaiden sei vnd aller gelo^vbigan sêlan gedenken vnd got fúr sú bitten. Vnd des alles ze offnem wâren vrkúnd vnd das dis also iemer me vnd eweklich sta^et belibe, so han ich Johans von Stainach statamman da vorgenemt min insigel von des gerichtes wegen gehenkt an disen brief, won es o^vch an gemainer vrtail ertailt wart, das ich es tůn so^elt. Ich Johans Getzenwiller da vorgenemt vergich ain gantz wârhait aller der vorgeschribnen dinge vnd gedinge, so hieuo^vr an disem brief von mir geschriben stant, vnd ze mêrer sicherhait der selben dinge, won ich aigens insigels nit han, so binde ich mich vnd alle min erben vnd nachkomen vnder des vorgenemten ersamen Johansen von Stainach statammans insigel, wâr vnd sta^et ze lâssenn vnd ze haltenn alles, das von vns an disem brief vorgeschriben stât. Dis beschach vnd wart dirr brief geben ze sant Gallen an sant Jacobs âbent des zwelffbotten im ho^ewat in dem jare, do man zalt von Cristus geburt drúzehenhundert jâr, sechszig jâr vnd darnach in dem sechsten jâre. Da ze gêgen warent dis ersamen manne Růdolff von Stainach⁹ hofamman ze sant Gallen, Johans der Kamber, Johans Ru^edger, Nyclaus der Snider, Hainrice Garnleder vnd ander erber lúte vil.

Source Fulltext: Chartularium Sangallense VIII, Nr. 5034, S. 224-225.