Wir graf Diethelm von Tokkenburg¹ chorher ze Cur tůnd kund vnd vergehent offenlich mit disem brief, daz wir mit rat willen vnd gunst v´nser lieben brůder graf Friderichs, graf Donats vnd graf Kraftz² vnd durch bessrung || dez gotzhus ze Cur das selb gotzhus vnd die phleg in weltlichen sachen wir vnd v´nser obgen(ante) brůder mit v´ns vnd nach v´ns vff genomen hand vnd nement mit vrkund dis briefs von dem erwirdigen v´nserm gena^edigen byschoff || Petern ze Cur³ mit so^elicher beschaidenhait stukken articuln gedingen vnd wis, als hie nach gescriben stat. Des ersten ist gedinget vnd geret, das der obgen(ant) byschof Peter v´ns vnd v´nsern brůdern daz gotshus dez byschtůms ze || Cur in phleg wis mit allen vestinen stat vnd telren vnd was daz gotzhus an geho^eret mit allen nútzen, vs genomen die vesti Furstenburg⁴ vnd waz dar zů geho^eret vnd in der herschaft von Tyerol⁵ gelegen ist, sont in nemen, vnd sol er v´ns daz in antwúrten, so ver er vermag, vnd múgen wir das haben vnd niessen mit allen nútzen, die da von komen múgent, als ainer gemainer phleger vnd als er selber ta^eti, v´ber das, so da von ietz versetzet ist vnd vor vs da von gan sol, vnd sont wir aber da von ja^erlich geben vier hundert gůter guldin vff die zil mit der sicherhait vnd an die stat, als die brief sagent, die wir dar vmb geben hant, von hinnenhin vff den nehsten sant Georien tag, der nu nehst kumpt, vnd dannen hin die nehsten fúnf jar, so schi^erost nach an ander kament, vnd sont och wir die wil vnd wir das selb gotzhus inn habent, vff den obgen(anten) byschoff Petern vnd sin gotzhus vnd nach komen kainer laig schaden oder kost vff schlahen rehnun noch raiten von dekainer laig sach, es weri dienst verlorn maiden zerung oder wie es gehaissen sig, dekaines weges, vnd wenn sich diu selb jar zal er loffen hat vnd vss kumpt, so súllen wir dem obgen(anten) byschoff Petern oder sinem cappitel ze Cur, ob er enwa^er, dann daz selb gotzhus hinwider geben vnd in antwúrten mit allen vestinen lút vnd gůt, als wirs in genomen hant, an all wider red vnd súmsa^eli. Es hât och der obgen(ant) byschoff Peter im selber vss genomen all collecten all erst nútz a^ellú gaistlichen geriht vnd reht vnd a^elli lehen gaistlichú vnd wa^eltlichú, vss genomen zins lehen, die múgen wir besetzen vnd entsetzen die obgescribenn jarzal als v´ns dunkt, das es vns fůglich vnd nutzlich sig. Der obgen(ant) byschof Peter hât och durch bessrung willen sim obgen(anten) gotzhus gnad vnd er getan, das daz cappitel vnd ander gotzhus lút edel vnd vnedel vnder in selber ain rat er wellent, vsser dem cappitel zwen chorheren, von dienstlúten zwen, vsser dem ampt ob dem Stain⁶ zwen vnd vss dem tal Valbrigell⁷ vnd Engendin⁸ zwen vnd von den búrgern der stat ze Cur zwen erber man, die súllen aber sweren v´ns als aim phleger von dez obgen(anten) byschoff Peters vnd des gotzhus wegen vnd in des gotzhus sachen ze raten, was sú dunket, das dem byschof dem gotzhus vnd v´ns das best^b) vnd dz nutzest vnd das erlichost sig, mit gůten trúwen^c) an all gewerd. Vnd also hat der obgen(ant) byschof Peter v´ns vnd v´nsern průdem als ainem phleger gantzen vnd wollen^d) gewalt geben vnd git mit sinem brief, das wir des obgescribenn râtz rat oder des meren tails vnder inen des gotzhus nútz vnd fromen werben, gúlt vnd schaden wenden vnd versorgen mugent mit lo^esen vnd versetzen des gotzhus gůt, mit rehtent vnd reht ze statten ze laisten vnd ze halten oder mit andern sachen, als danne dunket, dz dem gotzhus aller nútzost vnd fůglichost sig. Wir vnd v´nser brůder sullen och dem obgen(anten) byschof Petern ze aller siner notdurft mit des gotzhus vestinan, die wir inn hand oder noch in gewinnent, warten vnd och v´nserm aller gena^edigosten herren dem kaiser vnd sinen erben als ainem kaiser vnd kúng ze Beheim von sinen wegen vntz an sin widerrůffen, vnd sont dez v´nserm herren dem^e) kaiser v´nser brief geben, v´ns an allen v´nseren gedingt vnd ta^edingt, als wir mit im v´ber ain komen sint vnd an disem brief gescriben stât, vnscha^edlich. Bescha^ech och, das wir oder vnser gebrůder kain vesti oder gůt lút oder lant lehen oder aigen, das zů dem gotzhus durch reht geho^eret vnd des das gotzhus entwert ist, her wider an daz gotzhus bra^echtint endehaines weges von yeman, das súllen wir och mit anderm gotzhus gůt haben vnd niessen die obgen(ante) jarzal v^s, vnd sol das dem obgen(anten) byschoff Petern endehain merung bringen noch machen an sinem obgen(anten) ja^erlichen gelt, vnd wenn wir daz obgen(ant) gotzhus hinwider sont gen vsser v´nser phleg, so súllen wir och vnuerzogenlich die selben widerbrahten gůter dem obgen(anten) byschoff Petern oder dem cappitel, ob er enwa^er, och hinwider in antwúrten mit andern dez gotzhus vestinen lút vnd gůt an vff schlag kains schaden vnd an all wider red. Es ist och berett, wa^eri das die vogty ze Cur von dem obgen(anten) byschof Petern vnd von sinem gotzhus erlost wúrd, so sol man mit dem selben gůt losen vnd das gůt an legen dem gotzhus ze nutz nach der rat, die v´ns zů geben sint, oder des meren tails vnder inen, als vor gescriben ist. Wir vnd v´nser brůder súllen och aller menklich in dem gotzhus phaffen vnd laigen edel vnd vnedel arm vnd rîch nach v´nser mugent schirmen vnd aller mennklich bi sinen rehten lassen beliben mit gůten trúwen an all gewerd. Das der obgen(ant) byschoff Peter mit sinem^d) gotzhus lúten fridlich vnd gůtlich beliben mug vnd sú mit im, so tůt er in die gnad, das er hinnen hin vnd fúrbas mer kain gemainen phleger in weltlichen sach dem selben sinem gotzhus ze Cur geben noch setzen wil noch sol won mit des capitels vnd des gotzhus lúten oder dez meren tails vnder inen gemainem willen vnd rat, vnd hât inen dar vmb v´ns vnd v´nser gebru^eder ze tro^estern gen vnd ze sicherhait. Wir vnd v´nser brůder súllen och von dez gotzhus wegen enkain krieg vff nemen an rât der, die v´ns von des gotzhus wegen zů geben sint ze rat. Wer och, das der obgen(ant) byschof Peter vff sinem gotzhus sitzen vnd beliben wolt, so súllen wir im daz selb sin gotzhus hinwider in antwúrten, doch mit so^elichen gedingen vnd beschaidenhait, das er vor an so^elich trostung vnd sicherhait geb, das sin obgen(ant) capitel vnd gotzhuslút bi den gnaden wol beliben múgen, die er in getan hatt, als vorgescriben stat. Es ist och beret vnd bedinget, wer das, das der obgen(ant) byschoff Peter der vestinen kam losen wolt, die ietz versetzet ist, vnd dar vff sin wonung han wolt^f), das mag er wol tůn v´nser halb. Wer och, das der vorgen(ant) byschof Peter abgieng von todes oder suss nit byschof ze Cur sin wo^elt oder wa^er, so sont aim kúnftigen byschoff vnd besta^etem allú sini reht behalten sin vnd vnuertaidinget sin, doch mit solichen dingen, das wir bi allen stukken^g) articul vnd gedingen, als obgescriben stat an disem brief, beliben. Vnd daz dem obgen(anten) byschoff Petern vnd sinen nachkomen vnd dem capitel dis alles war vest vnd stett belib, so haben wir der vorgen(ant) graf Diethelm von Tokkenburg phleger vnd chorherr ze Cur, graf Friderich, graf Donat vnd graf Kraft ieglicher sunderlich ain aid ze den hailgen gesworn mit gelerten Worten vnd vff gehepten handen. Des ze vrkúnd vnd merer sicherhait aller vorgescribner ding so henken wir vnsriu aigeni insigel offenlich an disen brief. Der geben ist ze Prag an sant Michels abent, do man zalt von Cristus gebúrt driuzehenhundert jar, dar nach im sibenden vnd sehzigosten jar.

Source Fulltext: Chartularium Sangallense VIII, Nr. 5091, S. 266-268.