Hainricus^a) dei gracia episcopus Constan(ciensis)¹ omnibus presencium inspectoribus subscriptorum noticiam cum salute. Religiosi || in Christo conventuales monasterii sancti Galli ordinis sancti Benedicti nostre dyocesis nobis exposuerunt, quod venerabilis || in Christo Georius predicti monasterii abbas² olim contra eos unum emisit processum, per quem ipse in eosdem monicione || quindecim dierum previa excommunicacionis sentenciam promulgavit. Licet autem ipsi conventuales a dicta excommunicacione dudum sint absoluti per ipsum dominum abbatem, iniuncta etiam sibi exinde penitencia salutari, nichilominus tamen nonnulli presbiteri et clerici dixerunt et asseruerunt, quod ipsi conventuales propter dictam excommunicacionem et racione eiusdem in divinis officiis vitandi fuerint eosque sie vitaverunt, presertim ex eo, quod ipsi conventuales appellationem, quam infra quindecim dies predictos ad sedem apostolicam interposuissent, ut ipsi presbiteri et clerici asserunt, non sunt prosecuti. Et petiverunt a nobis ipsi conventuales, quatinus auctoritate nostra ordinaria declarare dignaremur, an ipsi conventuales ut prescribitur vitandi sint vel ne. Nos ut eo sanctius in huiusmodi negocio procedere possemus, certos fidedignos testes iuratos recepimus et examinari fecimus eorumque dicta in scripta redacta sollempniter publicavimus et recensuimus diligenter. Et quia invenimus et cognovimus ex huiusmodi testium dictis et aliis coram nobis deductis, quod ut subscribitur declarare possumus et debemus. Nos Christi nomine invocato iurisque ordine in talibus observando observato habitoque iurisperitorum consilio et solo deo pre oculis ipsos conventuales propter dictam excommunicacionem et racione eiusdem in divinis officiis vitandos non fore nec esse dicimus et declaramus. Mandantes et precipientes dilecto nobis in Christo decano decanatus apud sanctum Gallum, quatinus in proxima suorum confratrum congregacione presentes nostras litteras dolo et fraude penitus semotis publicet et eisdem litteris nostris in nulla parte detrahat sibi quoque et eisdem confratribus, ut presentibus acquiescant et contra formam presencium ipsos conventuales non vitent, alioquin ipsum decanum et quemlibet ipsorum confratrum huiusmodi mandatis et preceptis non parentes presentibus monicione sex dierum previa excommunicacionis sentencie innodamus adhibitis in premissis sollempnitatibus debitis et consuetis. In quorum omnium testimonium sigillum nostrum episcopale presentibus duximus appendendum. Datum Const(ancie) anno domini millesimo CCC^mo. LX^mo septimo, II kln. octobris, indictione quinta. R^b).

Source Fulltext: Chartularium Sangallense VIII, Nr. 5092, S. 269.