Ich Johans von Zwingenstain¹ ritter tůn kund vnd vergih offenlich mit vrkúnd dis briefs || allen den, die in ansehent lesent oder ho^erent lesen, das ich ze lo^esen geben han fúr || mich all min erben vnd nach komen minen gena^edigen herren abt Georien von gottes || genaden abt ze sant Gallen² sant Benedicten ordens vnd sinem obgenanten gotzhus all die win zehenden, so in minen wingarten oder in miner lútten wingarten ja^erklich zehenden wirt, die mir reht vnd redlich von dem vorgenanten gotzhus ze sant Gallen versetzzet warent vmb acht mark Silbers, der ich gar vnd gantzlich von minem^b) obgenanten herren abt Georien bezalt vnd gewert bin. Es ist och ze wissen, das ich obgenanter Johans von Zwingenstain gelopt han in gůten trúwen, das ich endlich vnd vngefarlich nach dem phand brief werben sol, wer aber, das ich in nit ietz ze mal fund, wenn ich in dem^c) min erben oder nachkomen finden, so so^ellen wir in wider geben, er sol och mir minen erben^d) vnd nach komen kain nútz noch from sin, wer^e) aber, das ich min erben vnd nachkomen den brief nit wider geben, als ich gelopt han, so sol er minem obgenanten herren von sant Gallen vnd sinem gotzhus kain schaden bringen, er sag minder oder me denn acht mark silbers. Och sol man wissen, das ich min obgenanten herren von sant Gallen vnd sin vorgenant gotzhus ledig vnd los gesait han vnd quit und sag in ledig vnd los der obgenanten acht mark silbers minder oder me, als der phand brief wiset, mit vrkund dis briefs. Vnd des ze offem vnd warem vrkund aller obgenanten sachen vnd geding so henk ich obgenanter Johans von Zwingenstain ritter min aigen insigel offenlich an disen brief fúr mich vnd all min erben. Der geben ist ze Zwingenstain in dem jar, do man zalt von Cristus gebúrt driuzehenhundert sehzig jar, dar nach in dem sibenden jar, an sant Laurenzen tag.

Source Fulltext: Chartularium Sangallense VIII, Nr. 5084, S. 264.