Allen, die disen brief sehent oder ho^errent lesen, kúnden wir Otto von Rambach¹ vnd Vrsul min eliche tochter, dz wir durch got vnd v´nser vordern vnd nachkomen selen heil willen v´nser vischoczen, so wir haben in Húrden² im se ze Rappreswil³, die geheissen sind in fronfach enent dem Herwel⁴, ein sechsten teil vnd ein zwelften teil des faches in nidergendem fronfach, ouch ein sechsten teil vnd ein zwelften teil des faches in vfgendem stritfach, ouch ein sechsten teil vnd ein zwelften teil des faches in nidergendem stritfach, ein zwo^elften teil vnd ein vier vnd zwentzigosten teil des faches in stokfach, ein vierden teil vnd ein achtenden teil des faches in vfgendem fluders, ein achtenden teil vnd ein sechszehenden teil des faches in nidergendem fluders, ein sechszehenden teil vnd ein zwen vnd drissigosten teil des faches vnd gemeinlich alle die vischenczen, die wir haben in den selben Húrden vff disen húttigen tag, als diser brieff geben ist, sy syen genempt oder vngenempt vnd wie si geheissen sind, mit allem recht, so dar zů geho^ert, ledig vnd loß geben haben vnd geben ouch mit disem brieff den erwirdigen geistlichen lúten dem abt vnd dem conuent vnd ir gotzhus ze Rúti⁵ des ordens von Premon(strey) in Cost(entzer) bistům, also dz si vnd ir gotzhus vnd nachkomen die selben vischenczen mit allem recht, so dar zů ho^ert, fúrbas sond haben vnd niessen besetzen vnd entsetzen, wie in notdurft vnd komlich ist, als ir eigen gůt vnbekúmbert vnd vngesumpt von v´ns vnd v´nsern erben. Wir haben v´ns ouch gantz enzigen vnd enczihend v´ns mit disem brief fúr v´ns vnd v´nser erben der selben vischenczen aller vnd jeklicher besunder aller zůgeho^erd alles rechten, so wir dar an nu oder nach in dehein wis jemer gewinnen mo^echten, gegen dem obg(enanten) abt vnd conuent ze Rúti vnd ir kloster a^vn geuerd, vnd haben wir dis getan mit den gedingen, das die vorg(enanten) herren von Rúti vnd ir nachkomen fro Elsbeten miner elichen wirtin seligen, Margr(eten) miner tochter seligen, Wernhers von Rambachs mins vatters seligen, fro Elsbeten von Rambach miner můter seligen, Albr. mins brůders seligen, fro Annen Lentz miner ewirtin seligen vnd aller miner vordem jarzit jerlich began sond mit zwein selmessen mit vigilien vnd mit brúnnenden kertzen vnd mit aller gewonheit, so man in ir closter hat zů den erwirdigosten jarziten, die si begand, vnd vff den selben jarziten sol man ouch in einer mesß min vnd miner tochter Vrsulen behúgt began jerlich, die wil wir leben, wenn aber got v´ber v´ns gebútet vnd wir von diser weit gescheident, so sond si v´nser jarzit ouch began vff den selben tag mit den eg(enanten) jarziten in aller wis, als vorg(eschriben) ist, vnd so uil me, das man vff dem selben jarzit drye messen haben sol, vnd sol vff dem selben tag der conuent getro^est werden ze tisch mit vischen vnd win, als da gewonlich ist ze den obersten jarziten. Wer aber, das die vorg(enanten) herren súmig wurden deheins jars an dem vorg(enanten) gotzdienst, desselben jars sol der nutz der obg(enanten) vischenzen vallen den frowen ze Wurmspach⁶. Ich obg(enante) Vrsula von Rambach vergich offenlich an disem brieff alles des, so vorg(eschriben) stat, das ich das ouch mit gůtem willen vnd gunst mit minem lieben vatter getan han vnd mit siner hand, vnder des insigel ich mich bind in diser sach. Des ze warem vrk(únd) so gib ich der obg(enant) Ott von Rambach fúr mich min tochter Vrsulen vnd fúr all v´nser erben den eg(enanten) herren vnd ir gotzhus disen brief offenlich besigelt mit minem eigen insigel. Der geben ist vff fritag nach Margarethe, anno domini M°CCC°LXVII°.

Source Fulltext: Chartularium Sangallense VIII, Nr. 5079, S. 257-258.