Wir Hainrich von gottes gnaden byschoff ze Costentz¹ tůnt kvnt allen, die disen brief ansehent oder ho^erent lesen, || das fúr v´ns kam vnser lieber getrúwer Johans von Nidrenwille² vnd veriach offenlich vor v´ns, das er den erberen || lúten Cůnratten Koppen burger ze Wile³, Annen siner elichen wirtenne vnd iro baider kinden Johansen, Walthern vnd Marga||reten gesw´stergiden ze koffent geben hett des Wysmans schůppůss ze Wille⁴, die Hainrich der Tyfer bûwet, vmb aht pfvnt gůter pfenning Costentzer múns, der er gar von inen gewert wa^er, vnd gab och do der selb Johans von Nidrenwille die selben schůppůss willeklich vff an v´nser hant vnd verzech sich daran alles sins rechten, won si von v´ns vnd^a) v´nserm gotzhus lehen ist, vnd batt v´ns flehklich, das wir si inen lihen||
woltint. Der bett habin wir in willeklich gewert vnd habin die selben schůppůss von dem selben Johansen von Nidrenwille vff genomen an v´nser hant vnd habin si wider gelihen vnd lihin die selben schůppůss ze Wille mit allen rechten vnd zůgeho^erden den selben Cůnratten Koppen, fro Annen siner elichen wirtenne, Johansen, Walthern vnd Margareten iren kinden vnd allen den kinden, die von in zwain iemer koment vnd geborn werdent, si sigin knaben oder tochtran, ze rechtem lehen mit disem brief, also das die tochtran man recht zů dem selben lehen haben sont als die knaben, vnd habin die selben lehenschaft gen inen getân vnd vollefůrt mit allen den worten werken vnd geta^eten vnd mit aller kraft, so darzů hort vnd notdúrftig was nach gewonhait vnd nach recht. Vnd ze warem vnd offem vrkv´nd aller dirre vorgeschriben ding gebin wir vorbenempter byschoff Hainrich von Costentz v´nser insigel an disen brief. Darnach vergich ich der vorgenant Johans von Nidrenwille ainer gantzen warhait alles des, so da vor von mir^b) geschriben stat, vnd hab och ich fúr mich vnd min erben gelobt, des obgenanten koffes recht wer ze sind nach recht âne alle geuerde. Vnd des ze ainer warhait gib och ich min insigel zů des obgenanten mins gna^edigen herren byschoff Hainrichs von Costentz insigel an disen brief. Der ist ze Costentz geben, do man von Cristes gebúrt zalt drúzehenhvndert jar, darnach in dem siben vnd sehtzigosten jar, an sant Johans abende des Thôffers.

Source Fulltext: Chartularium Sangallense VIII, Nr. 5074, S. 252-253.