Ich V^olr. Windegger vndervogt ze Jo^vnen tůn kunt vnd vergich offenlich an disem brief, || daz fúr mich kamen ze Jo^vnen in dem hof an offen gerîht Aydelheit Heinr. Kalten || êlichú wirtinn mit Johansen von sant Nesion¹, der ir, als geriht vnd vrteil gab, || vnd mit willen vnd gunste Heinrichs Kalten ir êlichen wirtes ze rehtem vogt geben ward, einunt vnd der selb Heinr. Kalt andrunt, vnd fůgt vnd machot do dú selb Aydelheit mit ir vorgenanten vogt, als geriht vnd vrteil gab, dem vorbenemten Heinrichen ir êlichen wirte âcht pfunt pfenning Zúr(icher) múntz, die er ir vff dem akker vnd dem wislin gelegen in der Glaserrun ze morgengab geben het, also daz der selb Heinrich Kalt dú selben âcht pfunt pfenning haben vnd vnbekúmbert niessen sol ze einem rehten redlichen lîpding ze ende siner wîle, vnd sol in daran nieman sûmen mit keinen sachen, vnd vertgot im o^vch dú obgenanten âcht pfunt pfenning vff dem obgenanten akker vnd dem wislin mit ir vorbenemten vogt in lîpdings wise, als vorgeschriben stat, an min hant in des vorbenemten Heinr. ir êlichen wirtes hant, als gerîht vnd vrteil gab vnd als erber lút, die darumb gefragt wurden, důcht, daz es kraft vnd maht hetti nû vnd hienâch. Vnd des ze vrkúnd so han ich der vorbenemt V^olr. Windegger min insigel nach rehter vrteil vnd durch beider teile bette willen gehenkt an disen brief. Der geben ist an dem na^ehsten zinstag nach sant Johans tag des To^vffers ze sungichten in dem iâr, do man zalt von Cristus gebúrt drútzehenhundert vnd sêchtzig iâr vnd darnach in dem sibenden jâre.

Source Fulltext: Chartularium Sangallense VIII, Nr. 5076, S. 254.