Officialis curie Constantiensis omnibus presencium inspectoribus subscriptorum noticiam cum salute. Noverint presencium inspectores || universi, quod sub anno domini millesimo CCC^mo LX septimo, indictione quinta, pontificatus sanctissimi in Christo patris domini Vrbani divina dei || providencia pape quinti anno quinto, die saturni, que fuit nona dies mensis octobris, constitutus coram nobis iudici in figura || discretus Johannes dictus Hegdorn de Raprehtswile¹ clericus Scolaris Constantiensis dyocesis et in habitu clericorum secularium coram nobis apparens et existens iuste de anime sue salute cogitans cupiensque ut asseruit in paupertate in presenti exilio altissimo famulari asserensque, quod bona et matura deliberacione et sano usus consilio deliberaverit, ut consilio ewangelice doctrine satisfaciat, omnia sua bona in pios usus donare intendat, ut divinus cultus augmentetur exinde, et ad hoc eciam faciendum nos accesserit. Et quia regularis observantia, que in monasterio Rúti² ordinis Premonstratensis dicte dyocesis vigeat, et divinus cultus, qui in eodem monasterio ardentissime peragetur, ipsum Johannem monuerint et traxerint, quod omnia sua bona mobilia et inmobilia et specialiter subscripta conferre tradere et donare donacione perfecta inter vivos pure et simpliciter propter deum et in sue ac progenitorum suorum animarum salutem intendat predicto monasterio in Rúti ac abbati et conventui monasterii eiusdem ipsius monasterii nomine, et ad consumandum huiusmodi suam piam intencionem idem Johannes Hegdorn in nostri ac notarii publici et testium subscriptorum presentia constitutus sponte et liberaliter pure et simpliciter dedit tradidit et donavit prefatis abbati et conventui monasterii in Rúti et ipsi monasterio bona sua inmobilia subscripta, videlicet quinque iugera vinearum sita in banno ville Sta^efi³, item unum pratum situatum iuxta oppidum Raprehtswile olim emptum a Hainrico dicto Wisseling, item bona et possessiones suas sitas in Pfa^efficon⁴ reddentes annis singulis nomine annui census sex frusta frumenti mensure usualis, item domum suam sitam in oppido Raprehtswile iuxta domum dicti Hatlikon omniaque alia sua bona mobilia et inmobilia per eum habita usque in presentem diem, bonis feodalibus suis dumtaxat exceptis, de quibus absque consensu dominorum eorundem feodorum nil disponere valeat, resignans in manus nostras et in manus honorabilis viri domini Hainrici abbatis monasterii in Rúti⁵ prefati nomine ipsius monasterii huiusmodi donationem et resignationem recipientis bonorum prescriptorum tam specificatorum quam non specificatorum et omne ins et dominium, quod sibi in eisdem suis bonis competiit et competere potuit de iure vel de consuetudine, constituens prefatos abbatem et conventum et ipsum monasterium veros possessores rerum donatarum predictarum. Et ad maiorem roboris firmitatem donacionis prefate renuntiavit prefatus Johannes Hegdorn pro se suisque heredibus universis omni exceptioni doli mali deceptionis et circumventionis cuiuslibet coactionis et metus cuiuscumque actioni infactum exceptioni debite sollempnitatis non adhibite beneficio restitucionis in integrum litteris graciis constitucionibus et consuetudinibus universis omnique alio suffragio canonum atque legum, quibus et quo mediante contra huiusmodi donationem et traditionem venire posset vel ea infringere modo quovis, adhibitis in premissis sollempnitatibus verborum et gestuum debitis et consuetis, petens a nobis, ut ipsis abbati et conventui et eorum monasterio litteras nostras in forma meliori, prout de iure fieri possent, super premissis donatione et traditione resignatione et renuntiatione tradere dignaremur. In quorum testimonium presens instrumentum per discretum virum Růdolffum dictum Brungger publicum auctoritate imperiali et curie Constantiensis notarium iuratum confici et publicari mandavimus sigillique officialatus nostri fecimus appensione muniri. Acta sunt hec Constantie anno indictione^a) pontificatu mense die et hora quibus supra presentibus discretis viris V^olrico dicto Goldast iuniori, Johanne dicto Spisser civibus Constantiensibus et Hainrico dicto Múller de Pfa^errich⁶ testibus ad premissa vocatis specialiter et rogatis. ||
(ST) Et ego Rudolfus dictus Brúngger de Wintertur⁷ publicus auctoritate imperiali et curie Constantiensis notarius iuratus, quia premissis traditioni et donationi resignationi renunciationi omnibusque aliis et singulis premissis presens una cum dictis testibus eaque sie fieri vidi et audivi, idcirco de mandato predicti domini officialis de premissis presens publicum instrumentum confeci et me aliis arduis negotiis prepedito per alium de prothocollo meo ingrossari feci et per hanc subscriptionem meam manu mea propria factam ipsum instrumentum approbavi et in hanc publicam formam redegi signoque meo solito et consueto signavi unâ cum appensione sigilli predicti domini officialis in testimonium et maiorem evidentiam omnium premissorum.

Source Fulltext: Chartularium Sangallense VIII, Nr. 5093, S. 270-271.