Ich^a) Hainrich von Scho^enstein¹ kúnd vnd vergich offenlich an disern brief allen, die in ansehent oder ho^erent lesen, dz ich mit gůter vorbetrachtung vnd nach raut || miner frúnt han ze lo^esent geben fro Angnesen der Vaistlinen wilent Alber Vaistlis seligen elicher wirtenn vnd Hansen Vaistlin, sinen geswistergiten || vnd allen iren erben, ob si enwerint, die gůt vnd die pfender, die mines vetteren seligen Dietrichs von Scho^enstain kint, die er het bi der Ordnerinen, || inne gehebt hant von Swigger Vaistlin vnd von sinen vordem, ainen zehenden ze Schan² vnd ain pfunt pfening ja^erlichs geltz ab der alb Blanka^eren³ vnd fúnff Scheffel korns ja^erlich ze Balzers⁴, die obgenanten gu^eter mit grunt mit graut vnd mit aller zůgeho^erd vnd mit allen rechten, so die obgenanten kint daran gehebt hant, han ich der obgenanten fro Angnesen Vaistlinen vnd Hansen Vaistlin vnd sinen geswistergiten vnd allen iren erben ze lo^esent geben an der obgenanten kint stat, der rechter vogt ich was. Ich vnd min erben súllent ouch ir vnd ir erben fúr die obgenanten kint, die der obgenant Dietrich het bi der Ordnerinen, vnd fúr ir erben vmb die losung der obgenanten gu^eter recht weren sin nach recht, wa ez inen notdúrftig wirt an gaischelichem ald an weltlichem gericht. Vnd dez ze offem vnd warem vrkúnd henk ich vorgenanter Hainrich von Scho^enstain min aigen insigel an disen brief fúr mich vnd fúr all min erben. Vnd ward der brief geben ze Lindow⁵, do man zalt von Cristus gebúrt drúzehenhvndert vnd sechtzig iar, donach in dem achtenden iar, an sant Bartholomeus tag.

Source Fulltext: Chartularium Sangallense VIII, Nr. 5143, S. 313-314.