Ich^a) Albrecht von Bůcheim¹ miner gnedigen herren der hertzogen von O^ester(rich) houptman vnd lantvog || ze Swaben vnd in Elsazz etc. tůn kunt offenlich mit disem brief, daz ich angesehen hab der || statt ze Rapprechtswille² grossen kosten vnd búwe, die si an ir stat machent, daz si doch || ane miner herschaft von O^ester(rich) hilffe vnd stu^er nit zůbringen noch volfu^eren mugent, daz ich da in namen vnd an statt der vorgenanten miner herren von O^ester(rich) vnd nach rate miner herren von O^ester(rich) re^aten, die do ze male bi mir waren, vnd von des gewaltes wegen, so si mir enpholen hant, den erbern wisen lúten dem rate vnd den burgern gemeinlich ze Rappretswille gegeben han vnd gib inen ouch wissentlich mit disem brief von besundern gnaden den zol, der daselbs ze Rappretswille von der brugg gat, zwelfgantze jar, so nach der date ditz briefs nu schierest nach einander koment, also daz si mit demselben zol ir statt besseren vnd buwen sullen nach ir vogtes rat vnd daz si ouch denselben ir zol besetzen vnd entsetzen sullen nach desselben ir vogtes rat, vnd doch also daz si ouch die brugg in eren haben vnd die mit demselben zol buwen, als notdurftig ist. Mit vrkúnde ditz briefs, der versigelt ist mit minem anhangendem insigel vnd geben ze Baden³ an sant Laurencijen abent nach Kristi geburt tusent drúhundert vnd se^achtzig jaren vnd darnach in dem achtoden jare.

Source Fulltext: Chartularium Sangallense VIII, Nr. 5142, S. 313.